723/2022-2023
Khawzawl, 1st June, 2022: Nimin tlai khan Khawzawl DC Pu C.C. Lalchhuangkima, DUDO Khawzawl, Khawzawl District Football Association (KDFA) hruaitute leh khawtlang hruaitute chuan Mualvawm Field Pavillion sak mek leh a panna kawng siam that mek rang taka zawh a nih theih nana hmalak tulte a hmuna enfiah pahin hmalak zel dan tur an sawiho.

District Bawrhsap Pu C.C. Lalchhuangkima chuan kumin Independence Day chu Mualvawm Field-a lawm hman tum a nih avangin Mualvawm Pavillion sak chu hemi huna hman theih tura zawh hman a ngaih thu a sawi a. Hna tlo leh tha, ram leh hnam tana rotling siam a nih theih nan hnathawktu leh viltute a chah a ni.

A panna kawng pawh Independence Day hma ngeia siam that vat a ngaih thu pawh sawiho a ni a. Hemi atan hian bialtu MLA leh Dy.CM pawh biak rawn nghal a ni bawk a. Hmalak zel dan turte Contractor-te nen inrawntlangin remchangah sawiho leh nise tih a ni.