722/2022-2023
Aizawl, the 1st June 2022 : Nimin (31.5.2022) kha khawvel pum huap a zuk leh hmuam vaihlo leh a kaihhnawih dona ni World No Tobacco Day a ni a. Hemi ni pual hian Zoram Medical College, Falkawn ah hun buatsaih niin vaihlo that lohzia inzirtir uar zel tul thu te sawiho a ni.

Kumina World No Tobacco Day thupui 'Poisoning our Planet' tih chu zirho niin hemi chungchang hi Dr. Jane Ralte, Registrar ZMC in a sawi a. Prof. H Manihar Singh, Dean ZMC hnen atangin vaihlo leh a kaihhnawih ten taksa an tichhiat dan hrang hrang chungchang te, natna hrang hrang zuk leh hmuam tih avanga awm thin chungchang te leh vaihlo thatloh zia te ngaihthlak a ni.