3036/2024-2025

Khawzawl, dated 15th November 2024: Sawrkar laipui Ministry of Social Justice and Empowerment hmalakna Prime Minister Dharti Aaba Janjatiya Gram Utkarsh Abhiyan (PM-DAJGUA) chu Mizoram chhungah kalpui a nih dawn tak avangin Khawzawl District ah pawh a chhawrtu tur mipui ten PM-DAJGUA awmzia leh an tana a tangkai dan tur an hriat theih nan November ni 15 atanga ni 26 chhung hian inhrilhhriatna hun IEC Campaign neih a ni dawn a. Vawiin khan Khawzawl DC Pu K.Vanlalthiana chuan Khawzawl DC Meeting Hall-a programme buatsaihah khuallian niin IEC Campaign hi a hawng a ni.

Khuallian chuan IEC Campaign launching Programme an thleng thei chu lawmawm a tih thu sawiin, he Prime Minister scheme thar an launch tak hi ropui a tih thu a sawi a. DC chuan scheme hian Khawzawl District ah chuan khaw 17 a huam theih tur thu a sawi a, hemi a tan a inhrilhhriatna IEC campaign a tan school naupangte tan Essay writting leh Painting-te buatsaih tum a nih thu sawiin, zirlai a tam thei ang ber tel tur a sawm nghal thu a sawi bawk. DC chuan he campaign chhung hian line department hrang hrangte chu thahnem ngai taka tawiawm turin a sawm a ni.

PM DAJ-GUA scheme hi Mission Antyodya in khaw hrang hranga zirchianna an neih hnua chhawmdawl ngai an hmuh atanga he scheme hi lo piang a ni a, kum 5 (2025 - 2028) chhunga kalpui tur niin ministry 17 an tel bawk a . He scheme hi scheme danga hamthatna dawng thei dinhmuna ding la dawng kim si lote tanpuina niin, he scheme hian thil tum lian pali (4) neiin, kawngpui leh a kaihhnawin siamthat, buh leh thil thar lama hmasawnna te, zirna tha a awm theihna tura hmalaknate bakah hriselna kawnga hmasawnna tur hrang hrangte a huam tel a ni. 

He scheme hawnna inkhawm hi Addl. DC Pu Lalfakzualan kaihruaiin DC Pu K Vanlalthiana'n scheme hawnna leh sawi zauna hun a hmang a, Pu Timothy R Lalhmangaiha, BDO in he scheme in a tumte presentation hmangin sawizauna hun a hmang a, Pu Elijah L.H Sanga'n lawmthu sawina hun hmangin he hun hi tih tawp a ni. He hunah hian line department hrang hrang aiawhte an tel a ni.