3035/2024-2025

2024 Sahmulphah thla ni 15: Sawrkar Laipui Ministry of Tribal Affairs hnuaia hnam hnuaihnung zawk leh ram leilung fa (tribal)-te dinhmun chawi kanna tur leh sawrkar scheme hrang hrang kal tlanga hma laknaa a tlabal lai thawm ṭhat leh tihchangtlunna tur ruahmanna, Prime Minister's Dharti Aaba Janatiya Gram Utkarsh Abhiyan (PM-DAJGUA) bul ṭanna tur leh he ruahmanna mipui hnena puanzar leh inzirtirna beihpui thlak tur chu Lunglei District tan Mizorama a nodal department, Social Welfare, Tribal Affairs, Women & Child Development Minister Pi Lalrinpuii chuan vawiin khan Lunglei DC Conference Hall-ah a hawng.

Minister Pi Lalrinpuii chuan Prime Minister-in DAJGUA chu October ni 2, 2024 khan India ram puma kalpui turin a hawng tawh tih sawiin, November ni 15 aṭanga ni 26, 2024 chhungin ram pum huapa he scheme chungchanga inzirtirna mipui hnena puangzar turin IEC (Information, Education & Communication) Campaign ruahman a nih thu a sawi a. IEC chu khawtlanga chengte min tibengvartu, hma min sawntirtu leh khawtlanga hmasawnna tak tak a awm theih nana mipuite rual taka ke kan pen hona a ni tiin, sawrkar ruahmanna chhawrtu tur takte'n bengvarna dik leh rin tlak rang taka an dawn theih nana hma lakna pawimawh tak a nih thu a sawi a. Mizorama PM-DAJGUA IEC kalpui turah chuan a bik takin hriselna (health) te, zirna te, environment - nungcha, thing leh mau humhalh chungchang te leh social welfare - khawtlang leh mipui hmasawnna leh hamṭhatna lamah te insawr bing a ni dawn tih a sawi a. He hma lakna hi a chhawrtu tur takte'n an chhawr a, khawtlanga hmasawnna thlentu a nih ngei a beisei thu a sawi.

Minister chuan sawrkarin mipuite tan hma lakna pawimawh tak tak leh ruahmanna ṭha tak tak a kalpui lai mekah tih awm tak tih hmaih emaw, scheme malin a huam phak loh thil pawimawh tak si emaw a awm thei tih sawiin, DAJGUA chu chu'ng hma lakna hrang hranga a pawp lai thawmna tur leh hmasawnna tluantling leh huam kim zawk a awm theih nana ruahman a nih thu a sawi a. Hmasawnna ruhrel thar din leh siam chhuah lam aiin a tlabal lai thawm ṭhat chu DAJGUA-in a tum a nih thu sawiin, he ruahmanna hnuaia Mizorama khaw 383 thlan chhuahahte hmasawnna tluantling a thlen ngei a beisei thu a sawi a. Lunglei District bikah khaw 48 thlan chhuah a nih thu leh he'ng khaw thlan chhuah aṭang hian khaw 6-ah chuan PMAAGY kal tlangin hma lak ṭan a nih tawh thu a sawi.

Lunglei District tana PM-DAJGUA IEC Campaign kalpui tur hawnna hun hi District Bawrhsap Pu R. Lalṭhazuala chuan kaihruaiin, kal khawmte lawmna thu a sawi bakah, hun buatsaih chhan a sawi fiah a. Lunglei District tana beihpui thlak tur hawnna hun a nodal department changtu Minister ho ngeia hman theih a ni chu lawmawm a tih thu sawiin, Lunglei District-ah IEC chu hlawhtling taka kalpui a nih a, khawtlang leh mipuiin an chhawr ṭangkai ngei a beisei thu a sawi.

He hunah hian Lunglei Municipal Council (LMC) Vice Chairman Pu K. Lalrinawma bakah, PM-DAJGUA hnuaia hma latu tur department hrang hrang official-te, thu thar theh darhtute, Local/Village Council ai awhte, tlawmngai pawl hrang hrang hruaitute leh MzSRLM hnuaia Self Help Group (SHG)-te an tel a. Additional Deputy Commissioner Pi Rochuangkimi Khenglawt chuan lawm thu sawiin hun a khar a ni.

PM-DAJGUA hnuaia hma lakna tur hian India ram pumah tribal-te chen tamna khaw 63,000 thlan chhuah niin, kum 5 chhung atan hma lakna tur sum cheng vaibelchhe 79,156 ruahman a ni a. Khaw thlan chhuahte hi Mission Antyodaya Survey, 2022 Critical Gap Report beh chhana thlan a ni a. Khaw thlan chhuah zingah hian Mizorama khaw 383 telin, Lunglei District bikah chuan khaw 48 (Bunghmun Block-ah khaw 12, Lunglei Block-ah khaw 13 leh Lungsen Block-ah khaw 23) thlan an ni a. He'ng khuaahte hian ministry 17 hnuaia scheme 25 kal tlangin hmasawnna ruhrel siam te, ei leh bar, zirna, inkal pawhna leh inbiak pawhna leh hriselna kawnga hmasawnna hna hrang hrang te thawh a ni ang.