2737/2022-2023

Champhai, the 19th November, 2022: Khawzawl District Bawrhsap Pu C.C. Lalchhuangkima chuan vawiin chawhnu dar 1 khan Khawzawl Vengthar Branch YMA buatsaiha Tuimuk dinthar lehna buatsaih chu hmanpuiin a hawng. Hemi kaltlang hian kum 2022 atanga 2025 chhung Tuimuk lui dunga nungchate khauh taka humhalha venhim tlat tum a ni.

Bawrhsap Pu C.C. Lalchhuangkima chuan Khawzawl Branch YMA hmalakna kaltlanga Tuimuk lui leh a hausaknate dinthar leh humhalh tura bultan a ni chu lawmawm a tih thu a sawi a. Vengthar Branch YMA te hmalakna chu midangte pawhin entawn se a duh thu sawiin, tanrual hi chakna anih angin thawhhona tha neih i tum ang u tiin mipuite a sawm a. Mizoram Fisheries Amendment Act 2022 in a tarlan angin sangha inthlahpun hunlai leh an fuan hunlai hi sawrkar chuan man phal loh hunah a puang a, October ni 10 atanga December ni 18 chhung hian lui dunga sangha man khauh taka khap bur a ni, a ti a. Lui dung humhalh leh sanghate humhalh hi mipui zawng zawng mawhphurhna anih avangin ralbang bik kan awm thei lo a ni, a ti bawk.

He hun hi Pu H. Lawmthanga, Chairman, Ram ngaw leh nungcha humhalh Sub-Committee Vengthar Br. YMA chuan a kaihruai a. Rev F. Lalsangkunga'n hunserh a hmang a, SP, VCP Vengthar leh Neihdawn bakah Fisheries Department, Branch YMA, Sub Hqrs. YMA leh Tuimuk Phai nei aiawhte ațangin thusawi ngaihthlak a ni bawk.

Program tan hma hian Bawrhsap Pu C.C.  Lalchhuangkima, SP Pu Lalchhuanthanga, SDC Pu Obed Lalmalsawma leh midang te'n Tuimuk lui kamah sangha an chhuah a. DC chuan sangha an chhuahte chu humhalh hram hram turin mipuite a ngen a ni.