2738/2022-2023

Champhai, the 19th November, 2022: New Champhai leh Zotlang inkar kawngpui, lirthei chetsual nasatna laia hmalak dan tur chu vawiin tlai khan Champhai DC Pu James Lalrinchhana hovin enfiah a ni.

New Champhai leh Zotlang inkar kawngpui kual laiah hian tun hnaiah bike accident avangin mi pathum an thi a. Chhinchhiah theih chinah helai hmunah hian kawngpui siam that anih hnuah lirthei chetsualna avangin mi 10 velin nunna an chan tawh a ni.

Accident prone area enfiahnaah hian Champhai DC Pu James Lalrinchhana chuan lirthei chetsualna avanga nunna chan an awm leh thin chu pawi a tih thu leh, lirthei khalhtute an fimkhur lehzual theihna tura hmalak tula a hriat thu a sawi a ni.

Kawng kual lai hi PWD engineer te chuan a san zawng leh a kual danah lirthei paih chhuak zawngin a awm lova. Lirthei tlan chak zawng hi darkar khata km 40 vel ni turin kawng kual lai hi siam a ni a, chu aia chakah chuan kawng kualah hian lirthei chetsual a hlauhawm ta thin a. Lirthei chetsualna tam ber chu tlan chak avanga a kual laia kawi zawh tak loh vang nia an rin thu an sawi.

Lirthei chetsual tamna kawng kual laiah hian lirthei an tlan muan theihna leh a khalhtute fimkhur theihna turin Rumble Strip, cautionary board, catch eye delineator leh reflector te belin accident barrier dah thar ni bawk se tiin an rel.

Hei bakah hian New Champhai leh Zotlang inkara speed breaker awmah lirthei khalhtute hmuh awlsam zawkna tur dah nise an ti a. Vawiina enfiahnaah hian Champhai DC leh Magistrate-te, Sub-Hqrs YMA hruaitute, PWD Engineer, VC aiawh leh BRTF hotute an tel a ni.