2106/2023-2024

Khawzawl, 2nd October 2023: Khawzawl Deputy Commissioner Office Buiding thar leh District Hriatrengna Lungphun hawnna chu vawiin khan ropui taka neih a ni a. Deputy Chief Minister Pu Tawnluia chu khuallian niin lungphun leh office building te hi a hawng a, Khawzawl District Information Booklet a tlangzarh nghal bawk.

Deputy Chief Minister chuan District hriatrengna lungphun nalh tak leh DC office tha tak mai hman theiha peihfel a ni ta chu lawmawm a tih thu a sawi a. He hun hi hlim taka hmang turin kalkhawmte chu a chah. Khawzawl District Lungphunah Mizo Lal leh pasaltha huaisen, kumpinu sawrkar laka zalennna sualtute chanchin tarlan a ni chu lawmawm a tih thu a sawi a, Mizo hnam thinlung chawisang zel tu ni thei se a duh thu a sawi. Deputy CM chuan District hmuh theih nan a thawktu hmasate chu he hunah hian an hriatreng thu sawiin, chibai a buk a.  District chuan mipuite rilru tilawmin, hmalam pana hma sawn zel turin  tumruhna leh taimakna rilru a pe a ni, a ti. Khawzawl District mipuite chu DC Office thar hlawhtlin zelna turin tanhona, thawhhona leh tanrualna tha keng nung zel turin a chah nghal bawk.

Tuichang AC bialtu Pu Tawnluia chuan hripui lengin kum hnih zet sawrkar thutchilh mah se, sawrkarin theihtawpin hmasawnna hna a thawk mek zel a ni, a ti a. Khawzawl District chhungah ngei pawh sawrkar office 24 dah a ni tawh tih a tarlang. Revenue Office tih changtlun te, District Local Administration Office leh District Transport Office bun te pawh hmachhawpah a tel thu a sawi a. Deputy CM chuan Khawzawl District Hospital chungchang pawh he hunah hian sawiin - DoNER Ministry chuan khum 50 awmna tur Khawzawl District Hospital sakna tur a pawm (approve) tawh tih a sawi a, Specialist Doctor in damdawiin an thutchilh theih nan post siam (create) a nih tawh thu a sawi bawk.

Khawzawl DC Office Building thar hi Special Assistance to State for Capital Expenditure (SASCE) 2020-21 hnuaia sum hmuh cheng nuai 1,000 hmanga sak a ni a. Mizo pa chhiara chhawng li a sang niin square meter 2119.26 a zau a ni. Chhawng hnuai berah (Basement - II) hian Canteen, Garage, Driver Room te a awm a, a chung chiahah (Basement - I) hian room 11 - Election Branch, Revenue Branch, Record Room leh a dangte a awm a, chhawng thumnaah (Ground Floor) hian Additional DC, Sub Deputy Commissioner Room, Superintendent, General Branch tiamin room 14 a awm a, chhawng linaah (First Floor) hian room 9 - Deputy Commissioner Room, SDO (Sadar) Room, Meeting Room leh a dangte a awm a; chhawng tinah hian inthiarna (toilet) dah vek a ni bawk.

Khawzawl District Hriatrengna Lungphun hi DC Office Building thar kawtah phun a ni a. Lungphun hi hawlh tlang (diameter) in feet 12 a sei, feet 15 a sang a ni a. A chhipah hian zana eng thei turin ‘lamp’ nalh tak dah a ni. Lungphun hi chhawng hnih - a hnuai hmai li leh a chung kil thum nei a siam niin; a hnuaiah hian Mizo leh English-in Khawzawl khaw pianchhuah dan, rambuai lai chanchin leh District a nih chhoh dan te ziah a ni a; Khawzawl District chhunga Kumpinu sawrkar laka zalenna sualtute - Laburha Sailo, Nikuala Zahau, Kairuma Sailo, Sangtonga, Pakulha, Taibeha, Sama Mawnga te chanchin pawh ziah a ni. A chung kil thumah hian - Mizo, English leh Hindi-in ‘Khawzawl District Hriatrengna Lungphun’ tih leh District Function tan ni - 12.08.2019 te ziah a ni. Lungphun hi cheng 455,000 senga siam niin, granite phek 14-ah thumal 4,000 chuang ziah a ni.

Khawzawl DC Office Building thar leh District Hriatrengna Lungphun hi Khawzawl DC Pu K. Lalrohlua chuan kaihruaiin inlawmna thu a sawi a. Sr. EE, PWD Project Division Pu Lalremruata chuan technical report a pe a, Chief Minister Pu Zoramthanga thuchah chhiar chhuahna hun hman a ni bawk.

Hawnna inkhawm hi hun hniha then niin, hun hnihnaah hian Khawzawl DC lo ni tawh Pu H. Lianzela, Pu CC Lalchhuangkima te bakah Sub Headquarters YMA President Pu PC Rosiama te hnena atangin thu sawi ngaihthlak a ni a. Khawzawl BDO leh DUDO Office buatsaihin he hunah hian Self Help Group te inphochhuahna hun siam sak a ni bawk. Mizo hnam lam leh costume parade hmuhnawm tak tak te, zaithiam zai te ngaihthlak a en ho a nih hnuah Khawzawl District VC Association President Pu Lalnunpuia’n lawmthu sawiin hun a khar a ni.