2107/2023-2024

2023 Khuangchawi thla ni 2: Kum tina hman ṭhin, October ni 2 - October ni 8, 2023 inkar chhunga kar khat awh faina beihpui thlak, "Faina Hapta" kalpui tur chu vawiin khan Kolasib District tan Kolasib Project Venga DC office tual zawlah District Bawrhsap, Kolasib Town Sanitation Task Force Chairman Pu John LT Sanga'n a hawng.

Bawrhsap Pu John LT Sanga chuan "India ram faina ni" (swachh bharat diwas) atana India Hnam Pa Mahatma Gandhi pian champha phak hman a ni chu thil inhmeh tak a nih thu sawiin, Mahatma Gandhi khan a hna thawh tam tak zingah a ngaih pawimawh em em chu faina a ni a, India ram kan fai lo kha a vei em em a, a thu sawi leh a chanchinbu kal tlangin faina a tlangaupui nasa hle a ni, a ti a. Mahatma Gandhi, John Wesley leh Florence Nightingale te thu sawi leh nun aṭanga faina pawimawhzia tar langin, mi ropui apiangin faina an ngai pawimawh a, ram changkang apiang an fai ṭhin, a ti a. Kolasib District chu State kawtchhuah a nih angin ram hmel lanna a ni a, pawn lam aṭanga lo kalte leh District danga mite tan pawha faina kawnga entawn tlak ni tura ṭan lak a ṭul a ni, a ti. Faina chu mi dang kuta dah mai lo va, mi tinin mahniah ṭheuh bul ṭan a, mi dang kawhhmuhtu nih zel a pawimawh thu sawiin, faina haptaah chauh ni lo, kum tluana fai reng turin faina chu kan nunah a bet tlat tur a ni, a ti a. Kolasib District mipuite chu faina kawnga theih tawp chhuah zel turin a chovin, a sawm nghal a ni.

Faina Hapta hawnna inkhawm hi UD&PA Kolasib-a SDS Pu Eddie Zonunkima'n kaihruaiin, Upa RV Thansanga, Diakkawn chuan hunserh a hmang a. Kolasib District Urban Development Officer Pi Christina Lalmuanzuali chuan inlawmna thu sawiin, September ni 15 - October ni 2, 2023 inkar chhunga Kolasib District-a Swachhta Hi Seva hnuaia faina kawnga hma lak dan report a pek bakah, Faina Hapta chhunga hma lak dan tur a sawi fiah bawk a. UD&PA Kolasib-a Inspector of Sanitation Pu Obeda Lalhuliana kaihhruaiin kal khawmte chuan faina thutiam (swachhta pledge) an tiam rual a. Kolasib Joint VC ai awhin Chairman Pu C. Roṭhuamluaia leh Kolasib Sub-Headquarters YMA ai awhin President Pu Thomas D. Lalengliana te'n thu an sawi a. Zaithiamte zai ngaihthlak ni bawkin, UD&PA Kolasib-a Sirder Pu Rothangdela chuan lawm thu sawiin hun a khar a ni.

Faina Hapta hawnna hunah hian sawrkar official-te, VC member-te, Swachh Bharat Mission (Urban) Local Ambassador-te, tlawmngai pawl hruaitute leh chanchinbu mite an tel a ni.