2518/2023-2024

Khawzawl, 27^th October 2023: Vawiin khan Khawzawl District DEO Pu K. Lalrohlua, Khawzawl DC ni bawk chuan thuthar lakhawmtute kawmin kan hma lawka MLA General Election lo awm tura Khawzawl District inbuatsaih dan leh hmachhawp te a hriattir.

1. Nomination Endik (Scrutiny) leh Inhnuhdawh (Withdrawal) chungchang: October ni 21, 2023 (Inrinni) chawhma dar 11:00 khan Candidate-te Nomination paper endikna hun neih a ni a, he hunah hian Candidate aiawh (Election Agent/ Proposer etc) te an tel a.  22-Tuichang (ST) A/C a Candidate tura hming pe lut mi pali te nomination hi endik a nih hnuah pawm vek an ni a; inhnuhdawhna hun hi October ni 23 (Thawhtanni) thleng khan hawn niin, inhnukdawk an awm loh avangin Candidate pali – C. Lalhriatpuia (INC), Tawnluia (MNF), W Chhuanawma (ZPM) leh Lalhmunsiami (Independent) te Tuichang bialah hian an awm dawn ta a ni.

2. Expenditure observer hovin training:  October ni 21, 2023 (Inrinni) khan Expenditure Observer Pu Shridar Dora, IRS hovin Expenditure kaihhnawih team hrang hrang ten training an nei.

3. EVM/VVPAT randomization: General Observer Pu Amit Singh Bansal hovin October ni 23 (Thawhtanni) khan EVM Randomization tumhnihna neih a ni a. 1^st randomization-a EVM hman tur thlan chhuah te chu he hunah hian an kalna tur Polling Station tih chian niin, reserve a awm tur te pawh tihchian an ni ta bawk.

4. Polling Officials Randomization: General Observer Pu Amit Singh Bansal hovin October ni 23 (Thawhtanni) khan Polling Officials Randomization neih a ni a. He hunah hian Polling Official team khata awm tur te tihchian an ni a, an duty na tur Polling Station hi 3^rd Randomization November ni 5 a neih turah tih chian a ni ang.

5. Candidate Expenditure endik: Nimin October ni 26 khan Expenditure Observer Pu Shridar Dora hovin Candidate Expenditure endik tumkhatna neih a ni a. He hunah hian Candidate aiawh te bakah Accounting Team te an tel a ni. Endiknaah hian Candidate te account bu (Candidate Expenditure Register) leh Accounting Team-in an vawn ‘Shadow Observation Register’ te chu endik a ni a. Endikna hi tumhnih dang neih leh tur a ni a, October ni 31 (Thawhlehni) leh November ni 4 (Inrinni) hian a hmun ngaiah neih leh a ni ang. He hunah hian a duh apiang tel theih niin, candidate expenditure account hi a duh tan Re. 1 (Cheng khat) pein Returning Officer, 22-Tuichang (ST) Assembly Constituency hnen atangin lei theih a ni.

6. Postal Ballot chungchang: 

i) Service Voter: Tuichang bial chhunga Service Voter mi 97 ten ETPBS (Electronically Transmitted Postal Ballot System) kaltlangin vote an thlak dawn a, October ni 24 chawhnu dar 12:30 khan Postal Ballot hi transmit (thawnchhuah) fel a ni tawh.

ii) Home Voting: PwD leh kum upa (kum 80 chunglam) atangin Home Voting facility dilna 142 a lut a, uluk taka enfiah a nih hnuah mi 112 te dilna chu pawm a ni. Home Voting buaipui tur hian Polling Team 6 siam a ni a, anni hian October ni 30 hian voters te inah kalin vote an thlak tir dawn a ni.   He facility kaltlanga vote thlaktute hi Returning Officer in Lawmpuina thuziak a pe vek bawk ang.

iii) Essential Service: Essential Service Duty te tan Postal Ballot dil theih a ni a. Tuichang A/C chhungah mi 13 he mi hmanga vote thlak tur an awm a, anni tan hian October ni 31 atanga November ni 2 thleng DC Office tualah vote thlakna hun hawn a ni ang.

iv) Postal Ballot Election-a duty te tan: Election kaihhnawiha mawhphurhna nei zawng zawng (Officials, Driver, Police etc) te tan October ni 31 atanga November ni 3 chhung hian DC Office-ah vote thlakna hun hawn a ni ang.

v) Polling Officials: Polling Station a duty tur Presiding Officer, Assistant PRO, Polling Officer te chuan November ni 4 khian Postal Ballot hmangin DC Office-ah vote an thlak thei ang.

7. Polling Official Training: Vawiin khan Polling Station hrang hranga duty tur Polling Official (PRO, APRO, PO) te tan Training tum hnihna chu Govt. Khawzawl High School-ah neih a ni a. Training hi November ni 4 khian neih leh a ni ang.

8. Mipui Zirtir kawnga Nitin Chanchinbute inelna: Chief Electoral Office, Media Cell te chuan kum 2023 inthlanpui pual hian Mipui Zirtirna Kawnga Nitin Chanchinbute inelna a buatsaih a. Inelna hi tehfung pali – Editorial, Headlines, Frequency leh 1^st page top-corner slogans te hmanga neih tur niin, Lawmman pakhatna in cheng 30,000, pahnihnain cheng 20,000 leh pathumna in cheng 10,000 an dawng dawn a. Khawzawl District chhunga chanchinbute he lawmman dawng pha ngei turin duhsakna ka hlan che u.

9. Meeting : Inthlanpui atana inpuahchahna te thlirho turin naktuk (October ni 28) chhun dar 12:00 hian DC Meeting Hall-ah meeting neih a ni dawn a. He hunah hian General, Expenditure leh Police Observer te bakah Returning Officer, Asst RO te, SP, Nodal Officer zawng zawng, Candidate emaw a aiawh, Party tin aiawh, MPF aiawh leh MJA te an tel ang.

Lawmthu sawina leh ngenna: Khawzawl District chhunga thuthar thehdarhtu ten Inthlan kaihhnawiha mipui hriattirna zau zawka min thehdarh sak thin avangin lawmthu ka sawi a. Khawzawl District hian a vawikhatna atan inthlanpui a hmachhawn dawn a ni a, Inthlan hma hun tlemte kan la neihah hian inthlan felfai, thianghlim, muanawm leh vote tlak thatna inthlan kan neih theih nan in tawiawmna leh thawhpuina ka ngen nawn leh a ni.