2517/2023-2024

2023 Khuangchawi thla ni 27: Mizoram Legislative Assembly Inthlanpui, 2023-a Kolasib District chhunga assembly bial pathuma inthlan nana Electronic Voting Machine (EVM) hman turte chu vawiin khan I&PR Conference Hall, Kolasib-ah hman theih tura buatsaih fel (commission) a ni.

He hunah hian polling station tina EVM (control unit + ballot unit) leh Voter Verifiable Paper Audit Trail (VVPAT) hman tur thliar fel (randomise) tawh sa chu EVM engineer-te'n hman theih turin an buatsaih a. A khawl lam buatsaih fel vek a nih hnuah candidate-te hming chhut luh niin, a kal dik leh dik loh enfiah leh vek phawt a ni a. Vote thlak nana hman theih mai tura peih felfai a nih hnuah khawih danglam theih tawh loh tura seal hmanga uluk taka char niin, dah ṭhat nghal zel a ni.

EVM commission-naah hian General Observer, Returning Officer-te leh election official dangte bakah, political party ai awhte pawh an tel a. EVM buatsaih fel sate hi a dik ngei a ni tih finfiah nan vote thlak chhin zel a ni.

Kumin Inthlanpui atan hian 4-Tuirial (ST) Assembly Constituency-ah EVM set 26, 5-Kolasib (ST) Assembly Constituency-ah EVM set 29 leh 6-Serlui (ST) Assembly Constituency-ah EVM set 34 hman a ni dawn a. Bial tinah hian thlaveng (reserve) tur dah a ni dawn bawk a. Vawiin hian Tuirial leh Kolasib biala hman turte commission niin, naktukah Serlui-a hman turte commission leh a ni ang.