No.2423/2020-2020

Vawiin khan Khawzawl District-a Covid-19 hri kai 3 te zinga 1 chuan dam takin District Hospital-a Isolation Centre a chhuahsan.

Thlahna huntawi Khawzawl District Hospital-a neih-ah Addl. DC Pu Paul L. Khuma chuan Isolation Centre chhuahsan tur chu Khawvel mihring nuai 4 chuang suat-tu Covid 19 hri huaisen tak leh dam taka a tawrhchhuah theih avanga fakawm a tih thu leh a lawmpui thu a sawi a, harsatna hi thuawihna leh huaisenna-a hneh theih a nih zia a tih chian thu a sawi. District Hospital-a Doctor, nurse-te leh thawktu dangte inpekna chu fakin ZMC-a thawn ngai lova inrintawkna leh inpekna nena Covid 19 hri kai an enkawl dam thei chu chhuanawm a tih thu leh a lawmpui thu a sawi bawk ani. Positive dang 2-te pawh an dam thuai theih nan duhsakna a hlan a ni.

He hun hi Dr. Lalngaihawmi Chhangte, Medical Officer, Khawzawl District Hospital-in kaihruai-in enkawlna an pek dan kimchang report a pe nghal a, Rev. F. Lalsangkunga, Vengthar Pastor Bial vawngtu in hunserh hmangin positive dam ta chhungte atangin lawmthu an sawi bawk.

Khawzawl SP Pu P.C Lalchunglura'n certificate a hlan a, Dr. Lalnunpuii Renthlei chuan lawmthu sawiin hun a khar ani.

Vawiin vek khan DC Rest House atangin mi 3 te khunghran hun chhung hmang zovin an chhuak bawk a, heti hian tun dinhmunah Khawzawl District-ah Quarantine Centre leh Isolation Centre hman lai 9 ah mi 59 an awm mek a, Centre 1-ah mi 7 vel awm mek ang an ni. Tangkhang rawn haw kalkawnga rawn thang mek an la awm bawk.