565/2024-2025  

Khawzawl, 27^th May 2024: Vawiin khan Khawzawl DC Meeting Hall-ah Khawzawl Bawrhsap Pu K. Lalrohlua District Level Committee on Green Mizoram Chairman ni bawk hovin Khawzawl District-a Green Mizoram Day 2024 hman dan tur rel a ni a. Green Mizoram Day pualin NH-06 (Khawzawl to Champhai) ah thing tiak 500 tal phun tura hmalak an rel.

Thutkhawm kaihruaitu Pu K. Lalrohlua chuan Green Mizoram Day 2024 thupui atan ‘I nunna atan thing phun rawh’ tih thlan a nih thu sawiin thing phun turin sawrkar department, khawtlang leh tlawmngai pawl mai bakah pawl hrang hrang te an inhuam hle a ni, a ti a. Pu Lalbiakchama Chawngthu, Divisional Forest Officer, Khawzawl Wildlife Division chu nikum lama Green Mizoram Day hman dan report pe turin a sawm zui nghal a ni.

Vawiin thutkhawm hian Green Mizoram Day 2024 chu Khawzawl DC Auditorium-ah hman ni se tiin an rel a. Khuallian atan 22-Tuichang AC bialtu Pu W. Chhuanawma, Deputy Govt Chief Whip sawm an rel. Green Mizoram Day puala inkhawm tawi hi Pu PC Rosiama, Honorary Wildlife Warden-in a kaihruai ang a; kangmei venna kawnga titha khua te hnenah chawimawina hlan a ni ang.

DC Auditorium-a inkhawm neih zawhah hian NH-06-ah (Khawzawl – Champhai) thing phun tur a ni a. Green Mizoram Day pual hian Khawzawl Wildlife Division chuan Tuimuk lei atanga Champhai lam kilometer 1.5 a thuiah thing tiak 500 tal phun tumin ruahmanna an siam tih thutkhawmah hian an tarlang. He hunah hian BDO Khawzawl atanga rawtna lo lut - MGNREGS hnuaiah khaw tina thing phun neih chu BDO Office leh Khawzawl Wildlife Division ten ruahmanna lo siam se tia dah a ni.

Meeting-ah hian Khawzawl District chhunga sawrkar department aiawh te leh khawtlang hruaitute an tel a ni.