269/2024-2025 

Khawzawl, 18th April 2024: Khawzawl District hnuaia Assembly Segment awmchhun 22-Tuichanga Lok Sabha Inthlanpui 2024-a duty tur Polling Party te chuan vawiin khan DC Office tualzawl atangin an duty-na hmun tur an pan a. Khawzawl District Election Officer Pu K. Lalrohlua chuan Polling Party te hi a vailiam a ni.

22-Tuichang huamchhungah hian Polling Station hla zual, vote thlak hma ni hniha kal ngai a awm loh avangin vawiin hian Polling Official zawng zawng te an chhuak a. Control Unit pakhat thlak a ngai tih loh chu harsatna lian tham a awm hriat a ni lo a, CU hi Political Party te hriatpuina hnuaiah thlak fel nghal a ni.

Khawzawl District (22-Tuichang) ah hian Polling Station 28 a awm a. Arro, Hmuncheng, Khawzawl Arro leh Khawzawl Electric PS te hi hmeichhe hlangin an enkawl tur ‘All Women Managed Polling Station’ an ni a. Sialhawk – II PS hi thalai rualin an enkawl (All Youth Managed Polling Station) dawn a ni. Khawzawl Dinthar PS chu Model Polling Station atan puan a ni bawk.