No.2463/2020-2020

Vawiin khan Khawzawl District-a Quarantine Centre 3 atangin mi 39 ten khung hran an nih hunchhung hmang zovin Centre an chhuahsan.

Quarantine Centre chhuahsante thlahna huntawi Presbyterian English School, Vengthar-a neihah Bawrhsap Pu H. Lianzela chuan Harsatna nei lova Centre an chhuahsan tur chu a lawmpui thu sawiin an awm chhunga an dawhtheihna leh thuawihna te chu fakawm a tih thu a sawi a. Harsatna kan tawh zawng zawngte hi engemaw tal-a hmasawnna min hmuh tirtu nihtir tum tura chahin anmahni in leh lo an thlen hunah pawh thuawih chhunzawm turte, fimkhur chhunzawm zel turte, midangte zirtirtu ni turte, tanpui ngaite tanpui tura inpeih reng turte leh Pathian duhzawnga awm zel turin a chah a ni.

He hun hi Pu James Lalnithanga, SDO(Sadar) in a kaihruai a, Upa K Roliana'n hunserh hmangin Pi Rochuangkimi Zadeng-in chhuak turte certificate a hlan a, Vengthar VCP Pi Lalpianthangi pawhin thu a sawi a, chhuak turte'n an pawisa thawhkhawm Rs. 3,600.00 Vengthar VLTF-ah an hlan a ni. Bawrhsap hian Govt. Khawzawl College atanga chhuakte thlahna hun pawh a hmanpui bawk.

Vawiin-a Quarantine Centre chhuahsante hi mipa 12 leh hmeichhia 27 an ni a, RT-PCR test ah pawh an negative vek tawh a ni. Heti hian tun dinhmunah Khawzawl District-a Quarantine Centre leh Isolation Centre ah mi 21 an la awm mek a ni.

Hetih lai hian Khawzawl DLTF hnena thilpek petu an la awm zel a. Tun hnaiah Ngaizawl Self Help Group ten Rs. 3,000.00 , Puilo VLTF, Vankal VLTF leh Vankal Village Organization ten an-hnah chihrang hrang thahnem tak an rawn pe a ni.