No.2464/2020-2020

Lawngtlai, Nikir thla ni 26, 2020: Lawngtlai District-a COVID-19 positive case 8 te chu Zoram Medical College (ZMC)-ah RT-PCR hmanga an swab sample endik nawn a nih hnuin an negative vek tih hmuh chhuah a ni a. Vawiin khan Lawngtlaia Covid Care Centre (CCC) atangin dam taka chhuahtir an ni.

COVID-19 positive dam chhuak CCC atanga chhuak turte hi an chhungte leh medical team te'n kawngka bulah lo hmuakin, an lawmpuizia entir nan kut bengin an lo lawm a. CCC-a anmahni enkawltu Dr Elsadai B. Lalbersiama'n dama chhuah an nihna lehkha (discharge certificate) lo hlanin, District Medical Superintendent Dr Zothanpari Chhakchhuak chuan dam chhuakte leh an chhungte tana hriat tur pawimawh a hrilhfiah a. Chhuah feltir an ni.

Lawngtlai CCC-a enkawl positive dam chhuakte hi mipa puitling 5, hmeichhe puitling 2 leh mipa naupang 1, an zavaiin mi 8 an ni a. An chhuah hnu hian ni sarih (7) chhung mahni in lama inkhung hran chhunzawm rih tur leh, hemi chhung hian pawn chhuak lo va, inleng pawh kawm lo va, mahni chhungte nen pawh fimkhur taka khawsa ho turin thu rawn an ni a. Fimkhur tura tih an nih rual hian mi dang tan hlauh tur leh thinhrik chhan tur a awm lo tih medical lam chuan an sawi.

Heti hian tun dinhmunah Lawngtlai District-ah COVID-19 positive an awm tawh rih lo a ni.