No.2109/2020-2020

Nizan thleng khan Khawzawl district chhungah Covid-19 hrileng avanga state dang atanga rawn haw-te zinga mi 227-te hrawk tuihnang (swab sample) endik tura laksak an ni tawh. Sample hi 268 lak ani tawh a, mahse heng zinga 41 hi chu lak nawn leh an nih avangin mihring laksak zat chu 227 an ni. Test result 158 hriat tawh chinah +ve awm lai 2 te bak kaithar hmuhchhuah an la awm lova, June ni 4 leh a hnu lama sample lak te result erawh a la hriat rih loh thung ani.

Nimin khan C Lalropuii, D/o C Lalthangkima, Khawzawl Electric Veng, Kum 2017-a GNM zirchhuak leh Singapore-a kum 2 expetience nei tawh chu Covid 19 hrileng dona kawnga a tul apiang thawk turin a inpe bawk.

Hetih lai hian State danga tangkhang ten Khawzawl an thlen belh zel a, nizan khan Hyderabad atangin hmeichhia 1 a rawn thlen belh leh a. Heti hian tun dinhmunah hri leng vanga State dang atanga Khawzawl District a haw chu mi 270 an tling tawh a, heng zinga mi 172 te hi Quarantine Centre leh Isolation Centre ah an la awm mek ani.

Mi inphal te hnen atangin Khawzawl DLTF chuan thilpek a dawn chhunzawm zel a. Nimin khan VLTF Vangtlag-in Rs. 6,000.00, UPC(Mizoram) LAD, Rabung Kohhran-in Rs.2,000.00 leh VLTF Tuipui ten tomato tam tawk tak an rawn pe ani.

Attachment

  • Loading attachment...