2142/2026-2027 

Dated Khawzawl, the 9th September, 2026 : Vawiin khan Khawzawl District AIDS Prevention Control Committee (DAPCC) chu an Chairman leh Khawzawl Bawrhsap ni bawk Pu K. Vanlalthiana kaihhruaiin DC Conference Hall-ah an thukhawm.

Vawiin thutkhawmah hian District AIDS Control Officer Dr. Albert Lalhminghlua chuan Mission AIDS Suraksha-a (MAS) Khawzawl District dinhmun sawiin, committee member-te nen hmalak chhunzawm dan tur sawiho a ni a. MAS thiltum chu 95:95:95 niin, a awmzia chu HIV hrik pai zawng zawng zinga za zela 95-in hrik an pai tih an inhre tur an ni a (1st 95) , HIV kai, an dinhmun hre zawng zawng zinga za zela 95-in Antiretroviral Therapy (ART) an ei vek tur a ni a (2nd 95), ART ei zawng zawng zinga za zela 95-te viral load a tla hniam tur a ni (3rd 95). Tun dinhmunah Khawzawl District-ah 2nd 95 leh 3rd 95 achieve tawh niin, MAS thiltum pathum zinga pahnihah a hlawhtlin tawh avangin August thla khan Saksham stage-a hlankai a ni a. HIV hrik pai za zela 90 in an dinhmun inhre tawhin, 1st 95 target achieve a nih theih na tura hmalak dan tur sawiho a ni a. Kawlkhulh, Khawhai, SIalhawk leh Rabung khuaahte leh Khawzawla ruihhlo ngaite enkawlna Home pathumah awareness cum Free Health Clinic neih nise tia rel a ni.

He thutkhawmah hian Intensified IEC Campaign kalpui dan tur sawiho a ni bawk a. Khawzawl District chhunga khaw 25 thlan chhuah tur niin, heng khuaahte hian awareness campaign cum testing neih tur a ni a. Hei bakah hian in tinah IEC material sem chhuah te, college zirlaite hnenah awareness campaign neih te ruahman a ni bawk a. IEC Campaign atan hian Rs. 2,60,000 dah niin, thutkhawm leh hunah hmalakna hrang hrangte thlirho leh tur a ni ang. Vawiin thutkhawmah hian Khawzawl SP Pu Amit Kaushik, official dangte leh khawtlang hruaitute an tel a ni.