710/2022-2023
Khawzawl, the 31st May, 2022: India ramin zalenna a hmuh champha kum 75-na lawmna Azadi Ka Amrit Mahotsav kalpui mek zelah a lawmna peng pakhat atana India ram puma “Mi Retheite Chhawmdawlna Inkhawmpui-Garib Kalyan Sammelan' buatsaih Prime Minister hova vawiina hman chu Khawzawl DC Confrence Hall atangin Video Confrence kaltlangin District Bawrhsap Pu C.C. Lalchhuangkima hovin zawm a ni. He hunah hian sawrkar scheme hrang hrang 16 (sawmparuk) zet hnuaia tanpuina dawngtute chu Prime Minister-in kawmna hun a hmang a ni.

India ram pumah, state leh district zawng zawngah he lawman hun hi hman a ni a. Khawzawl District-ah chuan Prime Minister-in tanpuina dawngtute kawmna a neih hma in, zing dar 9:45 ah DC Conference Hall, Khawzawlah inkhawm tawi buatsaih a ni a. He inkhawm tawiah hian department hrang hrang 5 (panga) atangin an scheme kalpuite sawifiahna hun ngaihthlak a ni a. Scheme hrang hrang atanga tanpuina dawngtute nen inkawmna hun neih a ni.

Pu C.C. Lalchhuangkima, Deputy Commissioner chuan hamthatna dawngtu beneficiary-te chu kawmna hun a hmang bawk a. Inkhawm tawi hi Pu James Lalnithanga, SDO (Sadar) in a kaihruai a, Pu Obed Lalmalsawma, SDC in lawmthu sawiin hun a khar a ni. Inkhawmah hian District chhunga scheme hrang hrang thlan chhuah atanga tanpuina dawngtute leh khawtlang hruaitute mi 64 zet an kalkhawm a ni.

Inkhawm tawi hi a tawp hnuah chawhma dar 11:00 ah Shimla, Himachal Pradesh atanga Prime Minister-in mipuite hnena a thuchah leh scheme thlan chhuahte atanga tanpuina dawngtu India ram hmun hrang hranga awmte a kawmna chu video-conferencing hmangin an chhim zui nghal a ni.