711/2022-2023
Ṭomir thla ni 31, 2022: Vawiin kha khawvel puma vaihlo dona ni, "World No Tobacco Day" a ni a. He ni pual hian chawhma dar 11 khan National Tobacco Control Programme (NTCP), Lawngtlai District huaihawtin Lawngtlai SP Conference Hall-ah hun hman a ni.
He hun hi Lawngtlai Additional Superintendent of Police Pu C. Lalruatkima chuan a kaihruai a. He hun hmanpuitu Lawngtlai SP Pu Rakesh Paweriya chuan a lem nena entirin, vaihlo leh a kaihhnawihin taksa a tihchhiat theih dan hrang hrang a tar lang a. District Hospital Lawngtlaia Medical Officer Dr Lalrindika chuan vaihlo leh a kaihhnawih ṭhat lohzia leh, ṭul lova sum khawh ralna leh taksa tichhetu vaihlo leh a kaihhnawih laka inthiar fihlim a pawimawhzia a sawi bawk.
NTCP Lawngtlai District-a Social Worker Pi H. Vanlalmuansangi chuan vaihlo khuahkhirhna dan, Cigarettes and Other Tobacco Products Act (COTPA), 2003 sawi fiahin, Lawngtlai District-a NTCP hma lakna report a pe a. Report-a tar lan a nih dan chuan, kum 2020 - 2021 chhung khan Lawngtlai District-a mei zu ṭhin, NTCP Clinic pantute zinga mi 423-in mei zuk an sim a; school 7 leh Kohhran 3-ah vaihlo ṭhat lohzia zirtirna awareness campaign buatsaih niin, Anti-Tobacco Squad leh pawl hrang hrang hnenah ṭum 8 training huaihawt a ni.
Lawngtlai khawpui chhungah kum kal ta 2020 - 2021 chhung khan danin a phal loh meizial (cigarette) zuar endikin Squad Drive ṭum 28 buatsaih a ni a. School 8 endik niin, he'ng school chhehvela vaihlo kaihhnawih zuarte endik a ni bawk.
Vawiina Lawngtlaia World No Tobacco Day hmannaah hian thupui atan "Tobacco: Threat to Our Environment" tih thlan a ni a. He hunah hian Lawngtlai Police Officer-te, Southern Public High School naupang leh zirtirtute, village council (VC), Young Lai Association (YLA) leh Lai Women's Association (LWA) ai awhte leh Mizoram Journalists' Association (MJA) Lawngtlai District ai awhte an kal khawm a. Kal khawmte hian vaihlo leh a kaihhnawih laka inthiar fihlim tura intiamna (pledge) an sawi rual bawk a ni.
