No.2122/2021-2022

Aizawl, the 4th September, 2021: Nimin khan Pu C.C. Lalchhuangkima, Deputy Commissioner, Khawzawl District chuan Khawzawl District chhunga Covid Care Centre (3C) leh Community Covid Care Centre (4C) a hman tur bungrua, Chief Minister’s Relief Fund (CMRF) atanga leite Khawzawl District Hospital-ah a sem chhuak.

Khawzawl District Bawrhsap Pu C.C. Lalchhuangkima chuan hun rei tak chhung Covid 19 hri kai nei mumal lova Khawzawl District a awm hnuah leh hmun thenkhatah sikul leh biakinte pawh hawn a nih mek laia  tunhnai kar khat chhung vela Khawzawl District-a hrileng hmuh chhuah a pung ta chu beisei loh thil a nih thu a sawi a. Covid 19 hri leng mek chu thih leh dam inkar a ni tawh a, thihna a thlen lohna turin pawl leh mimal tinte tangruala theihtawp kan chhuah a ngai a ni, a ti bawk.

Khawzawl District Bawrhsap chuan sawi zawmin, hrileng chhuchat tura hmalakna kawngah District thuneitute ruahmanna chu a tha ber leh dik ber a ni kher lo thei a, inlungrual taka kan thawhho a ngai thung a ni tiin, mass testing kalpui mek pawh hri leng dangchat tura kan dinhmun chiang taka hriat a tul vang a ni, a ti a. Mass testing kalpui mekah mipuiin in test an hreh lo chu lawmawm a tih thu a sawi bawk a ni. Hrileng mek hi state lian zawk leh ram lian leh hausa zawkte pawhin an buaipui em em a nih avangin hrileng khuahkhirh tura tan lak a ngai a ni, a ti bawk.

Khawzawl District Bawrhsap hian 3C leh 4C a hman tur hmanrua chi hrang hrangte chu 3C leh 4C awmna hmuna Medical Officer leh VLTF aiawhte hnenah a hlan a. 4C tana hmanraw hlante hi Pulse Oxymeter, BP Digital Medtech, Digital Thermometer leh PPE suit pahnih theuh niin, 3C tana hmanraw hlante hi Shoe Cover, Face Shield, Hand Sanitizer, Inverter, PPE Set, N95 Mask, Sodium Hypochlorite, Oxygen Concentrator, Digital Thermometer, Electric Kettle, Nebulizer, Good Knight Liquid, Solar Emergency Light leh LED Torch Light-te a ni.

He hun Pu Lalrohlua, Additional Deputy Commissioner, Khawzawl District kaihhruaiah hian Medical Officer Dr. Albert Lalhminghlua'n report a pek bakah Pu H. Lalramenga, Sub Deputy Commissioner-in lawmthu sawina a nei bawk a ni.

Tun dinhmunah Khawzawl District-ah 4C awm zawng zawng hi 24 niin, 3C hi Khawzawlah pathum a awm mek a ni.