No.2523/2021-2022
Aizawl, the 7th October, 2021: Oxygen siamna khawl Pressure Swing Adsorption (PSA) Oxygen Generating Plant, minute khata Oxygen litre 250 siam chhuak thei, Prime Minister's Citizen Assistance and Relief in Emergency Situations (PM CARES) Fund kaltlanga District Hospital Khawzawla bunfel chu vawiin khan Bawrhsap Pu C.C. Lalchhuangkima chuan a hawng.

Khuallian Pu C.C. Lalchhuangkima chuan Oxygen siamna khawlpui PSA Plant chu Covid avanga Oxygen hman mamawh tak takte tan bakah, nakin zel thlenga Covid nilo natna dang vanga Oxygen mamawhte tana hman tangkai zui theih tur a nih thu sawiin, Prime Minister ruahmanna kaltlanga PSA Oxygen Plant Khawzawl District-in a nei chu lawmawm a tih thu a sawi a. Oxygen Plant bunfel a nih theihna kawnga District Hospital thawktute, P&E Department hotute leh thawktu dangte hmalaknaah lawmthu sawiin, hetiang khawl tangkai tak bun a lo ni ta hi Khawzawl District mipuite tan a vanneihthlak hle a ni, a ti bawk.

Oxygen siam chhuahna khawlpul PSA Oxygen Plant hawnna progamme Khawzawl District Hospital Meeting Hall-a neih hi Dr. Albert Lalhminghlua, i/c Medical Officer chuan kaihhruaiin technical report a pe a. Dr. Lalnunpuii, M.O (Ayush) in hunserh a hmang a. Hawnna hun hman zawh hian Prime Minister-in Internet kaltlanga ram puma PSA Oxygen Plant bunte a hawnna leh a thusawite ngaihthlak zui a ni bawk.