3805/2022-2023

Khawzawl, the 10th March, 2023: District Disaster Management Authority (DDMA), Khawzawl District buatsaih Quick Response Team (QRT) training, March ni 7-10, 2023 chhunga neih chu vawiin khan zawhfel a ni a. Kharna hun vawiin chawhnu dar 1 a DC Conference Hall-a hman hi DDMA Chairman Pu C.C. Lalchhuangkima, District Bawrhsap chuan khuallian niin a hmanpui a, training chhuakte hnenah certificate a hlan a ni.

Khuallian Pu C.C. Lalchhuangkima chuan chhiatrupna thlen thulha rang taka che chhuak tura din leh zirtirna pek Quick Response Team (QRT) tih hmasawn zel a tul thu a sawi a. Tun hnaia harsatna tawkte leh chhiatrupna thlenga kan chet chhuahnate thlirletin a tha viau a, mahse hmasawn zel tur kan ni, a ti a. Tun aia tha zawka chhanchhuah hna kan thawh theih nan training hi kan hman tangkai thiam a ngai a ni, a ti.

DDMA Khawzawl District Chairman chuan QRT member-te chu engtik lai pawha che chhuak tur leh inpeih reng tura ruahman an nih thu sawiin, hemi atan hian taksa leh rilru hrisel neih a ngai a ni tiin, QRT member-te chu insawizawi ngai pawimawh turin a chah a ni.

Training-ah hian QRT member 6 te an tel thei a. Training session 6 neih niin, Adventure lama thiamna nei Pu Lalhriatzuala, Bawngkawn leh Pu C.Lalthakima, Durtlang Leitan ten an pe a ni.

Traning kharna inkhawm hi Addl. DC Pu Lalvenhima'n a kaihruai a. Pu Lalhriatzuala, Trainer-in thu a sawi a hnuah Pu Lalrammawia, Convener-in report a pe a. Pu Obed Lalmalsawma, SDC in lawmthu sawiin hun hman a khar a ni.