No.2935/2021-2022

Aizawl the 10th November, 2021: Nimin khan Pu C.C. Lalchhuangkima, Deputy Commissioner, Khawzawl District chuan Khawzawl District chhunga Biate, Sialhawk leh Khawhai te tlawhin, heng khuaa hmasawnna kawnga hmalak dan tur khawtlang hruaitute sawipuiin a hmunah a enpui.

Khawzawl District Bawrhsap chuan Biate-a thingpui huante tlawhin, khawtlang hruaitute chu thingpui huante hlawk zawka kalpui dan tur leh langsar zawka phochhuah theih dan tur a sawipui a. Biate-a thingpuife siamna Samuel Tea Factory pawh tlawh nghalin, kuminah thingpuife packet 30,000 chuang hralhchhuah tawh a nih thu leh, hei hi cheng nuai 23 chuang man hu a nih thu factory a thawkte chuan DC an lo hrilh a, khawl hnathawh dan tlangpui an sawifiah bawk. Hemi hnu hian Biate CHC leh Biate tlanga Nature Camp siam tura ruahmanna awmte pawh a hmunah a en nghal bawk a ni.

Bawrhsap chuan Sialhawk khawtlang hruaitute nena inkawmna hun neiin, Sialhawk khuaa lakhuihthei chingtuten awlsam zawk leh hlawk zawka an hralhchhuah theih nan hmalakho ni se an ti a. Sialhawk Higher Secondary School leh PHC te pawh tlawhin, Helipad hmun tura ruahman a en nghal bawk. Khawtlang hruaituten an mamawh hrang hrang an thlente chu a tul anga a bawhzui tur thu DC chuan a hrilh a ni.

Khawzawl DC chuan Khawhai khua pawh tlawhin khawtlang hruaitute nen Khawhai tlang an tlawh a, langsar zawka phochhuah leh hlawk zawka kalpui a nih theih nana hmalak ngai hrang hrangte an sawiho a. Khawhai chu Mizo history-a thil pawimawh tak tak awmna leh thlen tamna hmun a nih angin zau zawka phochhuah a pawimawh tih a sawi a, chumi tura hmalakpui a inhuam thu pawh khawtlang hruaitute a hrilh a ni.

Khawzawl District Bawrhsap hi Khawzawl atangin Pu H. Lalramenga, SDC in a tawiawm a. A kalna khuaa khawtlang hruaitute leh sawrkar hnathawkten a tul dan ang zelin an lo tawiawm bawk a ni.