No.2836/2021-2022
Aizawl, 1st November, 2021: Vawiin chawhnu dar 2:00 khan District Election Officer Pu C.C. Lalchhuangkima, Deputy Commissioner, Khawzawl District ni bawk chuan DC Conference Hall, Khawzawl-ah Special Summary Revision of Photo Electoral Roll kalpui tur atan Draft Electoral Roll a tlangzarh.

Khawzawl District Election Officer (DEO) Pu C.C. Lalchhuangkima chuan inthlanna felfai kan neih theih nan Electoral Roll tha leh dik a pawimawh a. India khua leh tui kan nih anga chanvo pawimawh tak kan neih, kan aiawha ram hruaitute thlang chhuak thei turin Electoral Roll-a awm thei chinte chu kan awm vek a tul a ni, a ti a. Tuichang AC ah harsatna lian tham awm lova Electoral Roll buatsaih a ni thin chu lawmawm a tih thu sawiin, a hun taka Draft Electoral Roll tlangzarh a nih theih nana thawktu Election kaihhnawih official-te thawhrimna a fak bawk a ni.

He hunah hian Election Officer Pu H. Lalramenga chuan Tuichang AC chhunga Khawzawl Vengthar South Polling Station building leh Khawzawl Zuchhip Polling Station hming te chu thlak a ni tih a tarlang a. Electoral Roll Revision kalphung tlangpui bakah Draft Roll tlangzarh hnua tih hmabak leh mawhphurhna nei hrang hrangte dinhmun a sawifiah a, kan aiawha roreltute thlan chu India khua leh tui, kum 18 tling tawhte chanvo a nih angin, Electoral Roll-ah India khua leh tui dik takte chauh an luh theih nan kalkhawmte chu thawhpuiah a sawm a ni.

He hunah hian Pu Lalrinawma Kholhring, Data Entry Operator-in Tuichang AC bika kum 2021 Final Electoral Roll leh kum 2022 Draft Electoral Roll khaikhinna leh sawifiahna hun a hmang bawk a ni.

Khawzawl District Election Officer enkawlna hnuaiah hian Tuichang Assembly Constituency awmin, DEO bakah hian Electoral Registration Officer (ERO) pakhat leh Assistant ERO (AERO) pahnih an awm a. Draft Electoral Roll-ah hian voter mipa 8501 leh hmeichhia 8467, an vaiin voter 16,968 an awm a, Service Voter 96 an awm bawk a ni. Khawpui (town) huamchhungah Polling Station 13 leh thingtlang (rural) ah Polling Station 15, a vaiin polling station 28 a awm a. Heng hi Electoral Registration Officer (ERO) pakhat leh Assistant ERO pahnihin bakah Booth Level Officer (BLO) 28 in an vil mek a ni.

Draft Electoral Roll-ah hian vote 1007 awmna Khawzawl Vengthar North chu voter tamna ber a ni a. Urban Area Khawzawl leh Khawhai-ah voter 9,868 (58.16%) awmin, Rural Area -a khaw 13 ah voter 7,100 (41.84%) an awm thung a ni.

Vawiina Electoral Draft Roll tlangzarhna-ah hian Election Office-a thawk te, Khawzawl District Village Council Association, Sub-Headquarters YMA, Sub-Headquarters MHIP aiawhte, political party hrang hrang INC, MNF leh ZPM aiawhte leh Chanchinbumite an tel a, District Election Office buatsaih Draft Roll khaikhawmna (Overview) sem nghal a ni bawk.