Vawiin khan Khawzawl DC Pu H Lianzela hovin DC Conference Hall, Khawzawl-ah mipui ten thlamuang leh ralmuang taka kumin krismas leh kumthar an hman theih dan tur ngaihtuahin an thukhawm.

Meeting kaihruaitu District Bawrhsap chuan Krismas leh kumthar hunpui lo thleng turah mipuite an him zawk nan dan leh thupek kenkawh kawngah awmze nei zawka kalpui tul a tih thu a sawiin, sawrkar hmalaknate tha taka thlawp chhunzawm zel ni se a duh thu a sawi a ni.

Meeting chuan kum Krismas leh kumthar boruak a ralmuan theih nan December  Ni 22, 2019 atangin Khawzawl khaw chhung YMA branch 10-ah duty post siama duty thin nise tiin a rel a. Police in a remchan dan anga patroling neiin duty-na hmun siam turin leh, Magistrate thutchilh tura siam tura rel a ni a. Pal tlang khualzin phur lirtheite ruihhlo phur leh dan phal loh en dik turin Police ten check thin nise tiin an rel bawk.

Heng bakah hian halpuah, hal mawi leh naupang silai lem mu kapchhuak thei chite khapna siam ni se tia relin, Krismas leh kumthar inkarah police ten mobile court buatsaih an rel bawk.

He meeting-ah hian Magistrate, SP, SDPO, OC te bakah Khawzawl khawpui chhung NGO hrang hrang leh khawtlang hruaitu te leh chanchinbumi te an tel a ni.