Vawiin khan Art & Culture Auditorium, Venglai, Lunglei ah Mizoram Board of School Education (MBSE) buatsaih in Lunglei District chhunga High School leh Higher Secondary School zirtirtute tan Training on Question Setting Technique tih thupui hmangin training buatsaih a ni. He training ah hian MBSE siam kum 2020 Board Exam atanga hman tan tur Scheme of Examinations and Question design bakah Integrated Evaluation Scheme (IES) software update thar leh software manual chungchang inhrilh hriatna neih nghal a ni.

Mizoram ah Board Exam pass percentage kumtin in a sang a, chutih rualin Mizo zirlaite India ram chhung hmun dangte leh ram pawna zirlai dangte nena an inelnaah a ti tha lo leh a hniam zawk ah an tang fo mai a, hei hian quality education lamah tan kan lak a tul zia a ti lang chiang hle a. Zirchianna hrang hrang neih hnuah exam a zawhna set dan hian pawimawhna thuk tak neiin kan zirlaite ah nghawng nasa tak a nei tih hmuhchhuah a ni a. Hei vang hian Board pawhin kum 2020 HSLC leh HSSLC exam atanga hman turin exam dan kalphung leh zawhna zawh dan thar a duang a. Hemi zulzui hian kumin atangin zirtirna pawh kalpui mek a ni. A tum ber chu content-based question atanga competency based question tam zawk zirlai naupangte tana chhawp chhuah niin, hei hian an ngaihtuahna hman thiam kawng ah te, an hmalam hun atan leh school-a zirna kalpui danah tha zawka nghawng a neih ngei beisei a ni.

He training hi Pu Lalrinmawia Ralte, Academic Officer leh Pu F.Ricky Lalremruatpuia, Regional Officer MBSE te’n an pe a, Training hi naktukah pawh chhunzawm leh a ni ang.