Vawiin chawhma dar 11: 00 am khan Mizoram District paruk huam tura ruahman Mizoram Rural Bank (MRB) Regional Office, Lunglei chu Pi K.Lalrinzuali, Lunglei Deputy Commissioner in a hawng. Hawnna inkhawm ah hian MRB Chairman Pu V.Jaya Chandra leh MRB hnathawkte, sawrkar official-te, MJA Lunglei hruaitute leh sawm bik mi thahnem tak an kalkhawm.

Hawnna inkhawm Pu R.lalzarzova,Regional Manager, MRB kaihhruaiah Pi K. Lalrinzuali chuan thu sawiin Bank leh Banking products hrang hrang te ram changkang apiangin an hmang tangkai a ni tiin MRB Regional Office, Lunglei chu Mizoram tan hmasawnna mellung pawimawh tak a ni, a ti a. Tunlai khawvelah bank tel lova hmasawnna hna kalpui a harsat thu sawiin MRB Regional Office kaltlangin sawrkar hmalakna hrang hrang a bik takin Rural Development hmalaknate chak zawka kalpui a nih theih a beisei thu a sawi. Bank te theihtawp chhuaha mipuite hnena loan an pek chhuah lain mipuite pawhin a rulh lamah thahnem kan ngaih ve a tul a ni tiin loan chhia (NPA) a pun zel loh na turin mipuite theihtawp chhuah theuh turin a chah bawk.

Pu V.Jaya Chandra, Mizoram Rural Bank Chairman chuan Mizoram Rural Bank hian hma a sawn zel thu leh tun dinhmun ah pawh Mizoram a Bank hrang hrangte zingah Branch nei ngah ber niin hawn belh zel a nih tur thu a sawi a. Tunlai hian Krismas lo thleng tur urlawkin Loan diltute tan offer heng- Car loan, Personal loan, Pension loan leh Housing loan ah te siam mek a  nih thu a tarlang a. Kumthar lamah Loan scheme thar tlangzarh turin hmalak mek a nih thu a sawi bawk. Kohhran leh Pawl tan insakna tur Community Hall Loan chu kalpui mek a nih thu a tarlang bawk. Corporate Social Responsibility (CSR) kaltlangin kum tin cheng nuai 30 atanga 40 an hman thin thu a tarlang bawk.

CSR kaltlang hian Civil Hospital hnenah Water Cooler thar vawiinah khan hlan niin Lunglei Civil Hospital Medical Superintendent Dr SR Ngurchamliana’n Department aiawhin DC hnen atangin a dawng a ni.

Mizoram Rural Bank hian Branch 85 neiin, Head Office 1, Regional Office 2, Aizawl leh Lunglei a nei mek a. Thawktu mi 432 awmin, kumin Financial Year hnuhnung ber ah khan Deposit Rs. 2595 crore neiin Loan pek zat hi Rs. 179 crore a ni.