2865/2023-2024

Khawzawl 28th. November, 2023 : Vawiin chawhnu dar 1:00 khan Khawzawl District huamchhunga Cooperative Societies 29 hruaitute tan Mizoram State Cooperative Union (MSCU) hmalakna in Training buatsaih a ni a, Khawzawl District Function hnua District pum huapa Cooperative Societies te tana Training buatsaih hmasak ber hi Khawzawl District Bawrhsap Pu K. Lalrohlua chuan khuallian niin a hmanpui a ni.

Khuallian District Bawrhsap Pu K. Lalrohlua chuan thu sawiin Khawzawl District nih hnua a tumkhatnana Cooperative Societies Training neih a ni hi lawmawm a tih thu leh Societies Member te an tel tha chu lawmawm a tih thu a sawi a. Khawzawl District a chengte chu Mizoram-ah a District angin taima berah a ngai tih a sawi a, eizawnna kawngah Lakhuihthei, Tomato, Sapthei, Balhla, Sawhthing etc. te chu khaw hrang hrangah an thar chhuak nasa hle tih sawiin heng eizawnna peng hrang hrang te hian hma an sawn a, hma an lak chhoh zel theihna turin Society dinin Sawrkarah an in register a pawimawh tih a sawi a, vawiin Training a telte chu hlawk taka hun hmang turin a duhsak tih a sawi.

Khuallian chuan Khawzawl District hi District thar a ni a, hmundang atangin Cooperation Department in ala hmui rih tih a sawi a, chutihlaiin District Officer etc. te Khawzawlah ala dah theih reng tih sawiin DC Office-ah emaw an thutna tur hmun remchang an ngaihtuahsak thei tih a sawi bawk.

Vawiin Training hi Pu K. Lalduhawma, CEO, MSCU in kaihruaiin khuallian bakah Pu Lalnunsanga, Chairman, MCAB Ltd. pawhin thu a sawi a. Thu sawi te ngaihthlak zawh hnuah Training nei chhunzawm nghalin thupui 2 - 'Primary Society nihphung leh inrelbawlna' leh 'Role and importance of Cooperative Leaders' tih hmangin Pi TC Lalchawimawii, CDO, MSCU leh Pu R. Lalthlengliana, FEO, MSCU ten zirtirna an pe a. Zawhna leh chhanna hun te hmangin sawihona an nei nghal bawk.

Vawiin Training-ah hian Khawzawl District huamchhunga Cooperative Societies 29 atangin hruaitu 87 an tel a, Society pakhat atangin hruaitu mi 3 zel an tel a ni.