2864/2023-2024

Dated Serchhip, the 28th November, 2023: National Highway-54 laihzauh leh siamthat hna thawh mekah Serchhip District chhunga zangnadawmna la tawh, mahni In la thiat lo te chu vawiin khan Executive Magistrate te kaihhruaina hnuaiah endik niin, in pakhat thiah sak a ni.

NH-54 kawngpui laih mekah Serchhip District huam chhunga sawrkarin ram a lak fel tawh, dan anga zangnadawmna - compensation leh Rehabilitation and Resettlement sum leh pai dawng tawh te zingah in leh lo thiat duh lo lui te hi kum 2023 July leh August thla khan Magistrate ten an inah ngei kal chilhin an in te thiat tura thupek eviction notice pek an nih bakah ni 22 November, 2023 khan Serchhip DC Pu David Lalthantluanga, Competent Authority for Land Acquisition (CALA) chuan a hmunah tlawhin an thiah loh chhan te a endik bawk a.

Hemi hnu hian In la thiat lo an awm avangin vawiin khan Executive Magistrate Pu Lalhruailiana Zote leh Dr. Albert Vanlalruata bakah Serchhip SDPO Pu PB. Singh te chuan Chhingchhip khuaa kalin, In la thiat lo te hi a hmunah tlawh lehin Chhingchhip Venghlun-a Lalthuthlunga Hnamte S/o Pi Lalnunthari te chuan an In hi an la thiah loh avangin khawl hmangin thiah sak an ni a. Chhungkaw pahnih dangte chuan an In hi an thiah mek avangin thiah sak ngai lova lo thiat chhunzawm zel tura hriattir nghal an ni.

Vawiin-a In thiahna ah hian Serchhip atangin Police thahnem tak kalin kawngpui enkawltu NHIDCL leh Contractor te bakah khawtlang hruaitute an tel bawk a, buaina leh harsatna awm lova hmalak niin District thuneitute chuan zangnadawmna la tawh, mahni In la thiat lo te chungah dan anga hmalak chhunzawm zel a nih dawn thu an sawi a ni.