2863/2023-2024

2023 Sahmulphah thla ni 28: Vawiin chawhma khan Kolasib District Bawrhsap Pu John LT Sanga hovin Kolasib DC Conference Hall-ah kumin Krismas leh Kumthar vuakveta Kolasib khawpui chhunga veng hrang hrang kawn leh hmun remchang lai incheisiak buatsaih dan tur sawi ho a ni.

Kolasib Bawrhsap Pu John LT Sanga chuan Mizo Kristiante hunpui Krismas leh Kumthar vuakveta in leh khawlai chei chu hunpui boruak siamtu pakhat a nih thu sawiin, kuminah pawh Kolasib khawpui chhunga veng hrang hranga kawn leh hmun remchang laite chu VC hrang hrangte kaihhruaina hnuaiah chei leh tura ruahman a nih thu a sawi. Kuminah hian 'DC Bungalow' chu kum dang aia uara chei tum a nih thu sawiin, Krismas leh Kumthar vuakvetah a duh tan DC Bungalow hi tlawhna hun siam leh tum a ni, a ti.

Veng/kawn chei chungchang sawi honaah hian District Administration official-te bakah, DUDO Kolasib; Kolasib Town Joint VC Association Chairman; Kolasib Sub-Headquarters YMA leh MHIP ai awhte; Kolasib District MJA President leh ZOOM Kolasib ai awhte an tel a. Kawn chei Intihsiakna hi VC-te kaihhruaina hnuaiah kalpui ni se, lawmman pawh siam ni se, tih a ni a. VC-te chu hemi chungchangah hian hma la tura ngenna lehkha pek ni se, Kolasib District chhunga Civil Sub-Division-ah te chuan veng/kawn chei an duh a nih chuan SDO (Civil) te kaihhruaina hnuaiah kalpui mai ni se, tih a ni.

Kumin atana Kolasib khawpuia Kawn/Veng chei endik turin Sub-Deputy Commissioner Dr Lalramdintluanga kaihhruaina hnuaiah ZOOM Kolasib te ruat an ni a. Endik hun atan ni 23/12/2023 zan ruat niin, result puan leh lawmman sem hun chu DC kutah dah a ni a. Lawmman hi pakhatna atanga pathumna thleng bakah consolation prize siam tel ni se tih niin, lawmman atan pawisa leh citation pek ni se, tih a ni bawk.

Kolasib Bawrhsap chuan Krismas 2023 leh Kumthar 2024 lawmna hun lo thleng tur chu mi tinin zalen leh muanawm taka an hman theuh a duhsak thu a sawi a. Mi dangte tana harsatna siamtu ni lo va, mite tana malsawmna thlentu nih tum theuh turin District mipuite a chah a ni.