2106/2022-2023
Khawzawl 29th. September, 2022: Khawzawl District huap a ni 2 awh 30th Children’s Science Congress-2022, Khawzawl Zaingen YMA Hall-a neih chu nimin tlai khan zawh fel a ni.

Nimina Science Congress kharna inkhawmah District Project Coordinator, Samagra Shiksha, Khawzawl District Pi K. Lalsiamliani chuan District Level Children's Science Congress hlawhtling taka neih zawh a ni ta chu lawmawm a tih thu leh hemi hlawhtlin theihna tura zirlai naupangte tel tirtu School-te chungah lawmthu a sawi a. Nakum Science Congress-ah chuan tha leh zualin zirlaiten an tih a beisei thu leh kawngchhe hnuaiah leh Motor rui chunga zirlaite an tel hram hram chu lawmawm tiin, Education Director pawhin an thahnemngaihnate hriatpuiin a lawm hle tih a sawi a. Tun tum Science Congress-a thupui hman, Ecosystem chu tunlai boruak nena inmil thu leh Mizoram mai ni lo, India leh khawvelin a buaipui a ni a ti a. Tunlaia khawvelin a buaipui em em hman khat daih plastic, Single Used Plastic aia tha hman tur a awm theihnan zirlaite chu ngaihtuahna seng turin a chah bawk.

He hunah hian CRCC Pu PC. Rosiama'n zirlaite fuihna thu a sawi bakah Judge-te aiawhin Pu Jehova Jire-a, Govt. Khawzawl High School Science Teacher-in Report a pe a ni.

Khawzawl District Level Science Congress vawi 4-naah Junior Category-ah Isak Lalpianfela leh Lalrinkima, Govt. Middle School-II, Khawzawl-te chu pakhatna niin Lalrinsangi, PES Vengthar Pastorate chu pahnihna a ni a, Lalrinpuii, Govt. Chhawrtui Middle School leh Vanlalmalsawmdawngzela, Govt. Middle School Tualte-te chu pathumna an ni.

Senior Category-ah chuan Vanlalhriatpuii leh Ruthi Zomuansangi, Govt. Khawzawl High School-te chu pakhatna niin Ida Malsawmtluangi, PES, Vengthar Pastorate chu pahnihna a ni a, T. Lalremsangi leh Lalrinhlui, Tualte High School-te chu pathumna an ni.

Samagra Shiksa, Khawzawl District leh Science Teachers Association of Mizoram (STAM) tangkawp buatsaih District Level Children's Science Congress-ah hian Junior Category-ah School 17 telin Senior Level-ah School 9 an tel a, Khawzawl khawpui chhung bakah District chhung khaw hrang hrang atangin School an tel tha hle a ni.