2880/2022-2023 

Khawzawl, the 30th November, 2022: Khawzawl District Consultative Committee (DCC)/ District Level Review Committee (DLRC) chu vawiin chawhnu dar 1:00 khan an Chairman Pu C.C. Lalchhuangkima, District Bawrhsap hovin DC Conference Hall-ah an thukhawm. He hunah hian September 2022 quarter tawp thlenga Khawzawl District huamchhunga Bank leh Stakeholder hrang hrangte hmalakna thlirho a ni.

He hun kaihruaitu Bawrhsap Pu C.C. Lalchhuangkima chuan Bank leh Line Department hrang hrang aiawh kalkhawmte chu hmachhawpte tha taka hlen anih theih nana tan la turin a chah a. Financial Literacy Campaign chungchangah tan lak a ngaih thu sawiin, thingtlang khaw tam taka loneitute chu an chanvo leh dikna zirtir tam a ngaih thu a sawi bawk. Loan pekchhuah kawngah tanlak angaih thu pawh tarlangin, anmahni pana dawrtute puih an ngaihna zawnah tlanchhe lova pui thin turin a chah bawk a ni.

Pu Jyoti Munna Soren, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah quarter kalta chhunga Khawzawl District Bank leh Stakeholder hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni.

Meeting-a tarlan anih danin September 2022 quarter chhunga Khawzawl District-a Bank hrang hranga pawisa dahluh leh pekchhuah tam zawng inthlauhna khaikhinna Credit Deposit Ratio (CD Ratio) chawhrual chu 69.30 % a ni a; June 2022 quarter tawpa CD Ratio 69.37 % atangin 0.07 % in a tlahniam a, hei hian CD Ratio hrisel leh tha ni tura bituk zat 60 % chu a phak tho a ni.

2022-2023 Financial Year chhunga Annual Credit Plan (ACP) hnuaia hnathawhte thlirho ni bawkin, Priority Sector atana target cheng nuai 2792 atangin cheng nuai 1970.26 (70.56%) hu tihhlawhtlin a ni a, Non Priority Sector hnuaia target cheng nuai 1399 atangin cheng nuai 964.13 (68.91%) hu tihhlawhtlin a ni.

Pradhan Mantri Mudra Yojana (PMMY) kaltlangin Sishu hnuaiah mi 86, Kishore hnuaiah mi 179, Tarun hnuaiah mi 28 te hnenah loan cheng nuai 471.37 hu pek chhuah tawh a ni bawk. PMEGP hnuaiah mi 11 in loan nuai 33.24 an hmu tawh a, DAY NRLM/ MzSRLM hnuaiah mi 32 niin nuai 56.75, DAY NULM hnuaiah mi 2 in nuai 4 loan an hmu tawh bawk a ni. Hemi quarter chhung vek hian Priority Sector hnuaiah Non Performing Assets (NPA) cheng nuai 467.35 (1.04 %) leh Non Priority Sector hnuaiah NPA cheng nuai 44.60 (0.93 %) a awm a ni.

He hunah hian Pu Manish Raj, MGN Fellow, IIM chuan presentation a pe a. He hun hi Lead District Officer (LDO) Pu Siddharaj, Manager, RBI Aizawl chuan a telpui bawk.

Meeting zawh hnu hian District Bawrhsap Pu C.C. Lalchhuangkima chuan DDM, NABARD buatsaih Potential Linked Credit Plan (PLP) for Khawzawl District 2023-2024 chu a tlangzarh nghal bawk a ni.