2881/2022-2023 

Khawzawl, the 30th November, 2022: Khawzawl District chhunga National Bank for Agriculture and Rural Development (NABARD) kaltlanga hmalakna hrang hrangte enfiaha viltu District Level Review & Monitoring Committee (DLRMC) for RIDF/WIF chu vawiin chawhma dar 11 khan an Chairman Pu C.C. Lalchhuangkima, District Bawrhsap hovin DC Conference Hall-ah an thukhawm.

Pu C.C. Lalchhuangkima chuan NABARD kaltlanga Scheme hrang hrangte chu District hmasawnna pawimawh tak takte an nih thu a sawi a. Department-te pawhin an chhawr tangkai thiam a tul thu sawiin, department thenkhatte chuan thui tak an kalpui tawh a, chutih laiin hmabak erawh kan la nei thui hle a ni, a ti a. Kan thil zir leh hriatte hi kan kalzel nan hman tangkai a tul dawn hle a ni, a ti bawk.

Member Secretary Pi H.Lalhmachhuani, DDM, NABARD Champhai chuan District chhunga NABARD project Rural Infrastructure Development Fund (RIDF) leh Warehouse Infrastructure Fund (WIF) kaltlanga hmalakna kalpui mekte a sawifiah bawk.

He hunah hian NABARD project RIDF leh WIF hlutawmna leh tangkai taka hman a nih theih nana hmalak tulte sawiho a ni a. Line department-te chu an hnuaia NABARD project kalpui mekte zirchianga hemi project hnuaia hmalak theihnate pawh department hotute nena inrawn chunga lo inruahman lawk tura tih an ni a. NABARD project kalpui mekte a hun taka zawhfel anih theih nante, harsatna awmte enfiaha thuneitu sang zawka thlen anih theih nan a hmunah tlawha zirchian thin ni se tih a ni bawk.