650/2023-2024

Khawzawl, 1st June, 2023: Khawzawl District chhunga Central Sawrkar sum hmanga hmasawnna hnathawh Scheme hrang hrangte zirchianga enfiahtu, District Development Co-ordination & Monitoring Committee (DDCMC/DISHA) chu an Chairman Pu C.Lalrosanga, Member of Parliament (MP), Lok Sabha (LS) hovin vawiin chawhma dar 11 khan DC Conference Hall-ah an thukhawm.

He hun kaihruaitu Lok Sabha MP Pu C.Lalrosanga chuan sawrkar laipuiin CSS hmalaknate viltu District Development Co-ordination & Monitoring Committee a ngaih pawimawh thu sawiin, hemi hnuaiah hian district huapa thawhhona tha zawk a awm theih nan  mipui thlan roreltu, Sawrkar hnathawk leh NGO te'n inpawhtlang takin ngaihtuahna an sengho thin a, hmalaknate inhriatpawhtawn a pawimawh hle bawk a ni, a ti a. District thar ni chunga Khawzawl District-a hmasawnna hmuh tur a awm chho zel chu lawmawm a tih thu a sawi a. District hrang hrang fanna atangin CSS te tangkai taka chhawr a ni leh state dangte ngaihtuaha a titha pawl takte zinga Mizoram a awm chu fakawm a tih thu sawiin, hei hian thawhhona tha a entir a, central sawrkar duhdan pawh a ni, a ti a. Sawrkar laipuiin Information Technology leh Digitization lamah tan lain nasa taka kalphung a thlak thu leh inkaihhruaina thar a siam thu pawh tarlangin, harsatna kan tawh loh nan hemi kawngah pawh hian theihtawp chhuaha kan insiamrem ve zel a tul a ni, a ti a. Sawrkar scheme pawimawh hrang hrangte mipuite'n an hmelhriata an chhawr tangkai theihna turin zau zawka inhrilhhriatna leh inzirtirna neih a tul thu a sawi bawk.

Meeting-a tarlan a nih danin Mahatma Gandhi NREGA hnuaiah May ni 17, 2023 thleng khan Khawzawl District-ah job card holder 8,723 an awm a, October 2022 atanga May 2023 chhung khan inhlawhna tum 70 siam hman a ni. PMAY-G Awaasplus beneficiary 667 an awm a. MzSRLM hnuaiah SHG 397 din a ni tawh a, Sipai Lui SHG, Kawlkulh chuan nikum khan Mizorama Self Help Group ti tha ber lawmman an dawng a ni. Shyama Prasad Mukherji Rurban Mission (SPMRM) kaltlangin khaw 13 ah hmalak mek a ni bawk.

PHE Department hmalakna Jal Jeevan Mission (JMM) kaltlangin Khawzawl District chhunga khaw 24 ah tuilakna leh in tina tui connection pekna tur project kalpui chhoh mek a ni a. Tui connection pekna tura ruahman 4,694 atanga 4,237 zawhfel tawh a ni a. NABARD RIDF kaltlangin khaw 6 ah tuilakna zawhfel niin, khaw dang 2 ahte hna thawh mek a ni. PWD hnuaiah Pradhan Mantri Gram Sadak Yojana (PMGSY) kawng 6 (80.35 Km) zinga 5 (67.24 Km) te thawh zawh a ni a. Pradhan Mantri Krishi Sinchayee Yojana (PMKSY) ‘Har Khet Ko Pani’ hnuaiah Minor Irrigation Project 4 kalpui mek niin, Ground Water Irrigation Scheme hnuaia project 1 kalpui chu zawhfel tawh a ni.

P&E Department-in NABARD RIDF kaltlangin zau 1 ah electric power a pe a. Ministry of New & Renewable Energy (MNRE) leh Mizoram Sawrkar tangkawpte siam nizung chakna hmanga kawlphetha Mega Watt 20 (20 MW) pe chhuak thei Vankal Solar Park, North East a hmasa ber leh lian ber, cheng nuai 2,107 senga din chu hawna chhawr tangkai mek a ni a. Kum 2022 October atanga 2023 May zawh thlengin Khawzawl District-ah nau piang 180 leh thi 6 awmin Infant Mortality Rate (IMR) chu 33.33 a ni a. Nu nau chunga thi an awm lo a ni. Mi nawlpuia HIV test tihsak mi 707 zingah 14 (1.98%) an positive a. Naupai mi 382 test zinga 4 (0.05%) an positive bawk a. TB rinhlelh test 508 zinga 31 te'n an vei tih hmuh chhuah a ni.

Khawzawl District-ah Ration Card leh Aadhaar thlunzawm hna za zela 99.22 zawh tawh niin, beneficiary nena thlunzawm hna chu za zela 94.72 zawhfel a ni a. PMUY beneficiary 1,043 awm mekin, AAY Card 1,036 hnuaiah beneficiary 2,526 leh PHH Card 4,507 hnuaiah beneficiary 20,444 awmin, an tan hian a thlawnin buhfai quintal 9396.85 pek chhuah a ni a, One Nation One Ration Card kalpui a ni tawh bawk. National Social Assistance Programme (NSAP) hnuaiah tar chawmna/ tar pension mi 750, hmeithai pension mi 59 leh rualbanlo pension mi 19 te pek mek a ni a. SBM (U) kaltlangin October ni 17, 2022 atangin bawlhhlawh tawih thei leh tawih theilo thliar hran hna kalpui tan a ni a, PMAY-U hnuaiah beneficiary 2,045 an awm a ni. Heng bakah hian Department hrang hrang hnuaia Centrally Sponsored Scheme hmalaknate thlirho a ni bawk.

Vawiin Khawzawl District DISHA thutkhawmah hian Health & Family Welfare Board Vice Chairman Dr. Z.R Thiamsanga, MLA, Champhai North A/C, Member Secretary & District Bawrhsap Pu K.Lalrohlua, PD, DRDO Khawzawl Pu Lalfakzuala, CSS khawih Department hrang hrang hotute, DISHA member dangte leh sawm bikte an tel a ni.