649/2023-2024

Aizawl the 1st June 2023 : Vawiin ni 1.6.2023(Ningani) hian MZP Sub-Headquarters, Ngopa in zirlai HSLC leh HSSLC a ti tha, Distinction leh First Division a pass te chawimawina hun, Ngopa Jubilee Hall a neih chu Dr. L.Thangmawia, Lengteng bialtu MLA chuan khuallian niin a hmanpui.

He hunah hian thusawiin Dr. L.Thangmawia chuan Ngopa leh a chhehvel khuaah te hian IAS, MCS topper leh mi hlawhtling tam tak an lo chhuak tawh a, tuna zirlaite hian kan mi hmasa, retheihna leh harsatna tam tak paltlang a zirnaa mi hlawhtlingte sulhnu zui hi a bata kan bat a ni, a ti. Dr. L.Thangmawia chuan zirna atana a MLA Fund tam tak hman a nih tawh thu sawiin Civil Service Coaching kal tanpui nan te, zirlai thiamthei chhungkaw harsa tanpui nan te, HSLC leh HSSLC exam a ti thate lawmpui nan te, zirtirtu rawih nan leh sikul mamawh hrang hrang atan cheng nuai tam tak hman a ni a ti.

Dr L.Thangmawia chuan Lengteng bial leh Ngopa khaw tana sawrkar hmalakna hrang hrang a sawi a. Chung zingah chuan Ngopaa SDEO office building sak mek leh SDEO thar dah te, SDO(Civil) office a thawktu mamawh UDC, LDC leh driver te la thar turin Mizoram sawrkarin phalna a pek tawh thu te a tel a. Ngopa HSS-ah Science leh Commerce zirna kum 2022 atangin hawn tan a ni a, Kawlkulhah HSS Science zirna kumin 2023 atanga tan a ni dawn bawk a ni tiin Lengteng bialin zirna lamah bung thar a kai mawlh mawlh a ni a ti. Lengteng bial thalaite tan Ngopaah Youth Development Centre(YDC) sak zawh tawh a nih thu sawiin North Eastern Farmers' Union(NEFU) te nena tang kawpin Cement Mistiri training hlawhtling taka neih a nih tawh thu a sawi bawk.

Dr. L.Thangmawia chuan zirlai hlawhtling MZP in an lawmpuite chu chhuanawm a tih thu sawiin he an hlawhtlinna hi hma lam hun atana an kawng sialtu atana hmang a, Mizo hnam tana chhenfakawm ni tura an zirna taima taka chhunzawm zel turin a chah bawk a ni.

He hun hi Pu R.Lalduhawma, President, MZP Sub-Hqrts, Ngopain a kaihruai a, zirlai ti thate hi lawmpuina citation hlan an ni.

He hun hmannah hian Pu R.Lalthanmawia, Deputy Director, School Education; Pi Chhuanhlupuii, SDEO, Ngopa te leh MZP General Headquarters atangin Pu Jacob Lalmuanpuia, Gen. Secretary, MZP Gen. Hqrts leh MZP hruaitu dang ten an telpui bawk a ni.