648/2023-2024

Aizawl the 1st June, 2023: Vawiin khan Chanmari YMA Hall, Aizawl-ah School Education Department buatsaihin kumin 2023 HSLC (High School Leaving Certificate) leh HSSLC (Higher Secondary School Leaving Certificate) exam a topper te hnenah Chief Minister's Award hlanna neih a ni a. Chief Minister Pu Zoramthanga chuan khuallian niin he hun hi a hmanpui a, School Education Minister Pu Lalchhandama Ralte chu khualzahawm a ni.

Chief Minister hian HSLC topper mi pakhat hnenah leh HSSLC topper mi pathum te hnenah lawmpuina thu ziak (citation) leh tangkafai Rs. 50,000/- theuh a hlan a ni.

Chief Minister chuan thu sawiin HSLC leh HSSLC tithate hnena CM Award sem chu kumtin zirlai lehkhathiam tak tak ten an dawn thin avangin a hlutna a kiam ngai lova, pek an nihna chhan hi a ropui em avangin kan ngaihlu telh telh a ni, a ti a. Zirthiamna kungpuiah hian finna, ropuina, remhriatna, taimakna, tumruhna leh hlawhtlinna a inzemnghet em em a, zirthiamna hian kan suangtuah phak loh thleng hian kawng min lo hawn sak thin a, midangte tana malsawmna nihna kawng pawh a hawng zau bik thin a ni, a ti a. Pathianin mihring te a siam hian chhia leh tha hriatna min pe tel a, chumi hmang chuan duhthlan theihna min ruahman sak bawk a, he kan duhthlan theihna hi kan hman thiam a pawimawh em em a, zirlaite pawhin hei hi fing taka kan hman theihnan rilru fim kan put a pawimawh em em a, kan damchhung nun a hril dawn a ni a ti.

Khualzahawm School Education Minister Pu Lalchhandama Ralte pawhin thu sawiin, zirlai hlawhtlinna changte leh an nu leh pate chungah a lawmpuina a hlan a. Mizoram sawrkarin hun harsa leh khirh tak kum 2 chhung hmachhawn chunga zirna tihhmasawnna tura kawng hrang hranga a theih ang anga hma a lakna te pawhin rah tha a chhuah mek a, sawrkar sikulah pawh zirlai naupang an pung sawt hle a, tunhma a sawrkar sikulah chuan zirlai leh zirtirtu an inzat an tih thin kha tunah chuan a ni ta lo, zirtirtuten theihtawp chhuaha zirlaite hmakhua thlir chunga tan an lakna avangin hmuh theihin hma kan sawn a ni a ti bawk. 

Chief Minister's Award dawngtute chu hengte hi an ni:
HSLC topper-
Cynthia Lalhlupuii Shangpliang d/o Kyrshanbor Shangpliang, Falkland Veng, Aizawl, St. Paul's HSS

HSSLC toppers-
(Arts)
Rodinpuia Ralte s/o Lalremruata, Hlimen, Home Missions School

(Science)
Jonathan Lalhruaitluanga s/o C. Lalduhawma, Hnahthial Chanmari, St. Joseph's HSS

(Commerce)
Vanlaldika s/o Lalfakawma Hauhnar, Tlangnuam West, Aizawl, St. Paul's HSS

Kumin hian HSLC exam candidate zirlai 18,102 awmin zirlai 12,878 (71.14%) in hlawhtlinna an chang a, HSSLC ah zirlai 14,091 in exam ziakin 11,084 (78.66%) in hlawhtlinna an chang a ni.

Vawiin topper te chawimawina inkhawm tawiah hian School Education Secretary Dr. Lalzirmawia Chhangte inlawmna thu a sawi a. Keynote address petu School Education Director Pu Lalsangliana pawhin Chief Minister's Award hi kum 2013 atang khan bultanin kumin hi tum 11 semna a nih thu a sawi a. Addl. Director Pu Lalhmachhuana chuan lawmthu sawiin hun a khar a ni.

Attachment

  • Loading attachment...