112/2024-2025 

Khawzawl, 9th April 2024: Vawiin khan Khawzawl District Level Education Committee chu an Chairman, Khawzawl Bawrhsap Pu K. Lalrohlua hovin Khawzawl DC Meeting Hall-ah an thu khawm a. Chief Minister Pu Lalduhoma, Finance Minister ni bawkin Budget-ah zirtirtute Quarters sakna tur dah a nih thu a sawi chu Khawzawl District chhungah pawh tangkai leh daihzai taka hman a nih ngei theih dan tur an sawi ho a ni.

Thutkhawm kaihruaitu Pu K. Lalrohlua chuan kalkhawmte inlawmna thu sawiin, zirna kawnga hmasawn chu a thil ngaihpawimawh ber te zinga mi a ni, a ti a. Thutkhawm koh a nih chhan chu member kalkhawmte hnenah a hrilhfiah a, he mi hnu hian rorel tan a ni.

Pu K. Lalrohlua chuan Mizoram sawrkarin tun tum Budget-ah zirtirtute quarters sakna atan cheng vaibelchhe 30 chuang a dah chu lawmawm a tih thu a sawi a. He mi bawhzuina kawnga Khawzawl District Education Office-in ruahmanna an lo siam chu member kalkhawmte hian an thlir ho a, khaw tin mamawh dan a inan loh theih avangin ngaihpawimawh dan indawt (priority list) siam ni se tiin an rel a ni.

He hunah hian tunhnai thli leh ruah thawkin sikul a tih chhiat te chu SDRF hnuaiah DEO kaltlangin chhawmdawlna pek ni se tia rel a ni a. DEO hian khaw tina khawtlang hruaitute leh sikul enkawltute kaltlangin sikul thawmthat hna hi an en pui ang. Thutkhawm hian Khawzawl khawpui chhunga sawrkar zirna in hrang hrang ten zirlai an neih dan leh zirtirtu an neih dan an thlir ho bawk a, sawrkar enkawl Primary Sikul hrang hrang a zirlai inziaklut an pung chu thil lawmawm tak nia an hriat thu an tarlang a ni.