3054/2023-2024

Khawzawl, 15th December 2023: Vawiin khan Khawzawl District Election Office leh Sub Headquarters YMA, Khawzawl te inremna thuthlung bawhzuiin 22-Tuichang AC huamchhhunga vote tlak thatna Branch YMA te hnenah lawmman hlanna hun Khawzawl DC Meeting Hall-ah neih a ni.

Kum 2023 Mizoram Inthlanpui neih zawh takah khan, Khawzawl District Administration hnuaia MLA bial awmchhun 22-Tuichang AC a vote a tlak that theih nan Khawzawl District Election Office hma nasa takin a la a. Heng hmalakna peng pakhatah Sub-Headquarters YMA, Khawzawl te nen inremna siam niin, YMA Branch hrang hrang te hian an chanchinbu leh aurinna hmang te in vote thlak tura mipuite ngenna an siam a, intlar ngai lova mipui ten vote an thlak theih nan branch tinin ruahmanna an siam bawk.

He hun kaihhruaitu Khawzawl Addl DC Pu Lalfakzuala chuan 22-Tuichang bialah kum 2018 Inthlanpuia vote tla (80.07%) aiin kumin inthlanpuia vote tla (84.49%) chu za zela panga laiin a pung tih a tarlang a. Vote tlak that theihna tura hmalakna hrang hrang te sawi zauin; 22-Tuichang biala Polling Party-ten an duty-na hmun tur an thlen kim hmasak ber thu te, inthlan zawhah pawh an thlen khawm kim leh hmasak ber thu te leh Mizorama vote chhiar zo hmasa ber bial an nih thu a sawi bawk.

Khawzawl Bawrhsap, Pu K. Lalrohlua, District Election Officer chuan he hunah hian thu sawiin Khawzawl District-in a tumkhatna atan inthlanpui a hmachhawnnaah vote a tla tha chu a lawmawm hle a ni, a ti. Vote tlak that leh zualna tura hmachhawp awm te inhrilhhriatna hun hmangin, kum 2023 inthlanpuia vote tlak that theih nana thawktu - YMA Branch tin te leh MPF te chungah lawmthu a sawi bawk a ni.

Vawiina lawmman dawngtu YMA Branch te chu:

Pakhatna: Hmuncheng Branch YMA ₹12,000 + Citation
Pahnihna: Tlangmawi Branch YMA
₹7,000+ Citation
Pathumna: Arro Branch YMA
₹5,000 + Citation

Consolation Prize hi YMA Branch pasarih te hnenah hlan niin, cheng 1,500 theuh an dawng a ni. Chungte chu - Lungtan Branch YMA, Khualen Branch YMA, Vangtlang Branch YMA, Chawngtlai Branch YMA, Chawngtlai Phaiveng Branch YMA, Riangtlei Branch YMA leh Khawzawl Darngawn Branch YMA te an ni.