No.6555/2020-2021

Dated Khawzawl, the 16th November, 2020: Khawzawl District Bawrhsap, District Election Officer ni bawk Pu Zothanmawia chuan vawiin chawhma dar 11:00  khan DC Office Conference Hall-ah Special Summary Revision of Photo Electoral Roll, 2021neih mek  atana Draft Electoral Roll siam chu a tlangzarh.

Khawzawl District Election Officer (DEO) Pu Zothanmawia chuan India ram chu inthlang ram kan nih avangin inthlanna in dinhmun pawimawh tak a luaha, inthlanna felfai kan neih theih nan Electoral Roll tha leh dik a pawimawh a ni, a ti a. India khua leh tui kan nih anga chanvo pawimawh tak kan neih, kan aiawha ram hruatute thlang chhuak thei turin Electoral Roll-a awm thei chinte chu kan awm vek a tul a ni, a ti bawk.

Pu Zothanmawia chuan Draft Electoral Roll-ah hian Tuichang Assembly Constituency-ah voter 16,649 an awm mek tih tarlangin, heng zinga 8,356 chu mipa an ni a, hmeichhe vote nei 8,293 an awm bawk. Village Council leh NGO hrang hrang – YMA, MUP leh MHIP te'n Electoral Roll ennawn chungchangah Booth Level Officer-te an puih hian E-Roll a felfaiin a dik duh tih sawiin, VC leh NGO te chu thawhpuiah a sawm nghal a ni.

Pu James Lalnithanga, Electoral Registration Officer (ERO) leh SDO (Sadar) ni bawk chuan Election Commission of India atanga District level thlenga Election buatsaihtute inkhaidiat dan leh a kalphung tlangpui a sawifiah a. Tun dinhmunah Khawzawl District Election Officer chuan 22-Tuichang Assembly Constituency chauh a enkawl dawn avangin, District chhunga khaw thenkhat chu District dang DEO kutah a awm dawn tih a tarlang bawk.

Election Officer Pu H. Lalramenga’n Tuichang A/C chhunga Polling Station thar pahnih – Khawzawl Lungvar leh Khawzawl Arro a awm avangin Part awm zat pawh 26 atangin 28 ah a chho a, Polling Station pathum thlak niin, Khawzawl Town chhunga Part hmingte chu a veng hming lang tura thlak a nih thu a tarlang a. Final Roll tlangzarh thei tura tih ngai leh mawhphurhna nei hrang hrangte sawifiahin, tuna Draft Roll tlangzarh tak chu Village Council inthlan hnuhnung bera Electoral Roll nen hriatpawlh lo turin kalkhawmte a chah bawk.

Vawiina Electoral Draft Roll tlangzarhna-ah hian Khawzawl Joint VC, Khawzawl Group YMA, MUP, MHIP Sub-Headquarter aiawhte bakah political party pahnih – INC leh MNF  aiawhte an tel a ni.