No.6554/2020-2021
Aizawl, 16th November, 2020 : Vawiin khan Aizawl Deputy Commissioner/DEO Pu R.Lalramnghaka hovin Special Summary Revision of Electoral Rolls, 2021 leh General Election to the Aizawl Municpal Corporation chungchangah District Level Standing Committee chu Aizawl DC Conference Hall-ah an thukhawm. Special Summary Revision of Photo Electoral Rolls, 2021 neih mekah Draft Electoral Rolls vawiin khan tarchhuah a ni.
Aizawl Deputy Commissioner/DEO Pu R.Lalramnghaka chuan Election Commission of India thuchhuak angin Mizoram pumah Photo Electoral Rolls Summary Revision, 2021 neih tur a ni a, Draft Electoral Rolls chu vawiin ni 16.11.2020 hian mipuite en theih turin tarchhuah a ni tih a sawi a. Aizawl District-ah Assembly Constituency 12 a awm a, Draft Photo Electoral Rolls chu ni 16.11.2020 atanga ni 15.12.2020 thleng Electroal Roll atanga paih, thun thar, siamthat ngai leh insawn duhte tan dilna (claims & objections) BLO hnenah thehluh theih a ni ang a; www.nvsp.in atangin online-in dilna a thehluh theih bawk a ni. Aizawl DC/DEO chuan Special Summary Revision of Photo Electroal Rolls, 2021 chu tluang leh hlawhtling taka neih theih nan fimkhur leh thahnemngai taka thawk turin ERO, AERO leh BLO te beisei an ni a, Local Council, Village Council, political parties, tlawmngai pawl hrang hrangte leh media-te tawiawmna leh finchhuahna a ngen bawk.
Ni 16.11.2020 - 15.12.2020 chhunga dilna lut chu 15.12.2020 - 10.01.2021 chhungin ERO/AERO ten an endik ang a, endiknaah hian Veng/Khaw tina LC/VC, NGO leh BLO te tawiawmna beisei a ni. Hetianga an enfiah zawh hnua ERO-in thutlukna siam fel hnuah hming thunluh ngai, paih ngai leh siamthat ngaite chu Election Branch-in a thliar hrang leh ang a, hemi hnu hian Computer-a thunluh hna (data entry) thawh zui nghal char char a ni ang. Electroal Process hi ERONET-ah tih vek a ni. ECI-in ruahmanna a rawn siam angin, mi tupawh Draft Electoral Rolls hi lei duh chuan a soft copy (thlalak tello) chu Rs.100/- in leh a hard copy phek 1 Rs.5/- zelin a lei theih a ni a, amaherawhchu hard copy lei duhte chuan sawi lawk hmasak tur a ni a, a phek duh lai chauh lei theih a ni lo.
Draft Electoral Rolls, 2021 atanga thil chhinchhiah thlak deuhte lo tarlang ila :
1). Aizawl District-ah hian Voters 264294 awmin mipa 124382 leh hmeichhia 139912 an ni a, mipa aiin hmeichhia an tamna chu 15530 a ni.
2). Aizawl District-ah Electroal Roll Photo Coverage leh EPIC 100% neih a ni.
3). Aizawl District huamchhunga Assembly Consttituency 12-ah hian Polling Station 305 a awm a, average-a lakin Polling Station pakhat zelah Electro 866.5 awm ang an ni.
Vawiin meeting-ah hian Aizawl Municipal Corporation Inthlan chungchang pawh sawiho a ni a. AMC Inthlan neih turah Polling Station Voter 1000 aia tam awmnate chu semdarh a tul thu leh chutiang Polling Station siksawi ngai 100 lai awmte chu dilna thehluh mek a nih thu te, Polling Station 11-ah erawh Voter semdarh ngai tho mahse hmun remchang awm loh vanga siksawi theih rih lo tur thu te leh a zavaiin AMC Inthlan awm turah Voter 34,201 semdarh/siksawi an ngaih tur thute tarlan a ni.
