No.6553/2020-2021
Ministry of Jal Shakti in a buatsaih 2nd National Water Award-ah Mizoram chuan Best State Award dinhmun la in he lawmman hi vawiin ni 16.11.2020 khan Irrigation and Water Resources Minister Pu C. Lalrinsanga hovin a pisa-ah Irrigation & Water Resources Department hotuten a lawmnan thingpui an kil ho.
Irrigation and Water Resources Minister Pu C. Lalrinsanga chuan Best State lawmman Mizoram in a la chu Pathian malsawmna a ni, a ti a. Chief Minister zahawm takin Irrigation and Water Resources Department hmalaknate min phurpuiin min tuipui thin a, chu chuan phurna leh chona nasa tak min pe thin a, thawhhona tha tak hnuaiah Department lama kan hotute leh thawktute inpekna a thuk em em bawk a ni, a ti a. Zoram mipuite, a bikin loneituten sawrkar hmalakna an thlawp tha em em bawk a, hengte avanga he dinhmun hi thlengthei kan ni, tiin a sawi. He Best State Award hi Department mal bik nilovin Zoram mipui zawng zawngte lawmman lak a ni a; Irrigation and Water Resources Department kaltlangin Mizoram sawrkar chuan Irrigation scheme hrang hrang kalpuiin National Hydrology Project ah phei chuan small states category-ah a ti tha Top 3-ah Mizoram chu a lang a; Mizoram State Water Policy pawh February ni 27, 2020 khan Mizoram chuan kan nei tawh bawk a. Water Conservation leh Water Table neih that kawngahte, Irrigation Schemes hrang hrang kalpui danah te Mizoram chu India rama a ti tha ber pawlah kan la lang thei zel a ni, a ti a. Minister chuan State Water Policy hnuaiah Water Resources Regulatory Authority in kalphung awmze nei a neih theihnan Mizoram hmun hrang hrang 28 ah ruahtui tlakdan data lak a ni ang a, hmun 16-ah sensor dah a ni bawk ang a, tui volume leh tui luan chak dan, fur leh thal inkara tui awmdan, bakah spring source atanga a luan darh dan te, ruah sur atanga lei hnuaia tui in recharge dante zir chian a ni ang a; heng data collect atangin regulatory actions duan a ni ang, tiin a sawi. Irrigation Department chu Department lian tak nilo mah se, State Water Policy hlawhtlin nana a hnuk (key role) keng tu a ni, a ti bawk a ni.
National Water Award hi kum 2018 atang khan buatsaih tan niin a vawihnihna – 2nd National Water Award 2019 chu November Ni 11-12, 2020 chhung khan sem a ni a. Hetah hian Category hrang hrang 16 (sawm leh paruk) siam niin Best State (special category)-ah Mizoram chu lawmman Pakhatna hlan a ni. He lawmman la tur hian teh fung hrang hrang hmanga state hrang hrang teh an ni a. Water Conservation leh a kaihhnawih subject hrang hrangah te, Regulation lama hmalaknate, PMKSY leh Irrigation Scheme hrang hrang kalpui danah te teh fung duan a ni a. Mizoram chu Best State (Special Category) ah a titha bera puan a ni.
Vawiina Best State Award lawmna thingpuiin hona ah hian Irrigation and Water Resources Department Commissioner & Secretary Pi Sangchin Chinzah, Chief Engineer Pu Lalrotluanga leh midangte an tel a ni.
