124/2025-2026

Khawzawl, dated 10th April 2025: Vawiin chawhma dar 11 khan DC Meeting Hall-ah District Level Coordination Committee (DLCC) chu FOCUS design team hovin PROSPER - Promoting Rural Opportunities through Sustainable Production, Enterprise and Resilience, chungchang sawi ho turin an thukhawm a, Khawzawl DC leh DLCC Chairman ni bawk Pu K. Vanlalthiana'n hun a kaihruai.

Chairman Pu K. Vanlalthiana chuan FOCUS design team leh meeting tura lo kal te a lo lawm a, sawihona tha tak, Khawzawl district-in a hlawkpui ngei tur an neih theih a beisei thu a sawi. SDO (Sadar) Pu Suvigya S. Chandra chuan PowerPoint presentation hmangin thlai leh thei chungchanga Khawzawl district dinhmun a sawi a, FOCUS-DMU, Khawzawl hna lo thawh tawh dan te, thlai leh thei chin dan te, tuihna hman dan te, sector dang nena inkungkaihna awm te, district harsatna neih te, hma lak tum dan te leh thil tul dang a sawi a ni. Presentation zawh hian sawihona neih chhunzawm a ni a, Khawzawl district-ah lakhuihthei (pineapple) te, sawhthing (ginger) te, hmarcha te (chilli) te leh thei/thlai dang thar hnem deuh hlawk zawka hralhchhuah dan tur leh food processing a tha zawka hman dan tur sawi ho a ni. Chairman Pu K. Vanlalthiana chuan he PROSPER scheme hmang hian Khawzawl district chuan hma a sawn ngei a rin thu a sawi a, department te inlungrual taka thawk ho turin a sawm bawk a ni. Meeting zawh hian FOCUS design team hian Chawngtlaiah field visit an nei chhunzawm a, district office hnathawk thenkhatin an zui a ni.

He hunah hian sawrkar office hotute thahnem tak an tel thei a ni.

PROSPER scheme hi FOCUS (Fostering Climate Resilient Upland Farming System) scheme chhunzawmna tur a ni a, FOCUS 2.0 tih a ni bawk. He scheme hi International Fund for Agriculture Development (IFAD) hnuaia project a ni a, line department hrang hrang suihkhawmin kuthnathawkte'n hlawk zawk leh tha zawka hna an thawh theih nan hmalakna hrang hrang an nei a ni.