125/2025-2026

New Delhi, the 10th April, 2025: Nimin khan Pu Lalnghinglova Hmar, Minister of State, Labour, Employment, Skill Development & Entrepreneurship Department leh Japan Embassy-a First Secretary pahnih - Pu Hagiwara Ryusuke and Pi Tsubakimoto Mayumi te nen Mizoram House, Chanakyapuri ah an inkawm a, Japan Embassy kaltlanga Mizo thalaite tana hamthatna awm thei hrang hrang an sawiho.

LESDE Minister Pu Lalnghinglova Hmar chuan Mizoram chu state lian lo, workforce pawh tam lo ni mah se thalaite’n thil an thiam chak a, a bikin kum upa tamna ram Japan in a mamawh heng - nursing, caregiving leh hospitality sector ah te Mizo thalai theihna a sang tih a sawi. “Japan in demand a nei a, keini’n supply kan nei thung. Tunhnaiah LESDE Department hmalaknain Mizo thalai engemawzat chuan Japan ramah hna an thawk tawh a, hei aia lian a kalpui kan duh” a ti a, Japan Embassy chu thawhpuiah a sawm.

Pu Lalnghinglova Hmar chuan Mizo thalaite’n Japanese culture an ngaihven tih sawiin, “Mizoram chhunga huihawt cosplay-ah pawh kan thalaite’n Japanese culture pholan an uar hle. Hei hi intihhlimnaa tawp mai lovin eizawnna tling, Mizoram leh Japan thlunzawmna hmanrua pakhat ni thei se kan duh.” a ti. Hemi chungchangah Japanese organization te nen thawhho a duh thu Japan Embassy official-te chu a hrilh.

Sports Minister ni bawk Pu Lalnghinglova Hmar chuan infiamna chu mipui nawlpui inpawhna hmanraw tangkai tak a ni a ti a. Mizoramin Olympic 2036 vision a nei a, Olympic sports discipline thlanchhuahah JICA atangin Mizoramin sports coach a dil mek tih sawiin, a tul anga bawhzuisak turin a sawm nghal a ni.

Japan Embassy official-te chuan Mizoram leh Mizo thalaite chanchin chu ngaihnawm leh phurawm an tih thu an sawi a. India state dang te nen khaikhinin Mizoram atanga Japan rama hnathawk an la tam lo hle a, Mizo thalaite tana sawrkar hmathlir hrang hrang tihlawhtling turin thawhpui an inhuam reng tih leh, a bikin caregiving leh nursing sector ah Mizo thalaite theihna an hre tawh tih Mizoram Minister chu an lo hrilh. Infiamna leh cultural exchange hmanga Mizoram leh Japan thlunzawmna nghet zawk zawn tha an ti a, India ram chhung leh pawn a Japanese organization te nena thawhho kawngah pawh theihtawp an chhuahpui tur thu an sawi bawk a ni.

LESDE Minister leh Japan Embassy aiawhte hian a ranglama mumal zawka sawi chhunzawm an rawt bawk a ni.