1005/2022-2023
Khawzawl, the 22nd June, 2022: Pu C.C. Lalchhuangkima, District Magistrate, Khawzawl District chuan LPG (Regulation of Supply and Distribution) Order 2000, Sec 6 leh 7(1) (a) & (b) leh Cr. PC Sec 144 in thuneihna a pek angin Khawzawl District huamchhungah dan phal loh leh phalna nei lova Petrol, Diesel leh Gas kawl leh zawrh khapna thupek vawiin khan a chhuah.

Khawzawl District huamchhungah mi thenkhatin dan kalhin Petrol, Diesel leh Gas an zuar nia hriat a nih avangte, kangmei tichhuak thei a nih avang leh heng zawrhna bul hnaia cheng mipuite tan a him loh avangin mipuite him zawk nan khapna thupek hi chhuah a ni.

He thupek zawmlote chu dan anga hrem theih an ni a. Thupek hian chhuah a nih atanga thu leh awm hma emaw, thla hnih (2) chhung a huam ang.