1006/2022-2023
Lunglei District chhunga Environment humhalh kawnga Dan hrang hrangte zawm anih theihna tura hmalatu leh thuneitu ‘Lunglei District Monitoring Committee On Compliance Of Environmental Laws’ chu vawiin chawhnu khan a vawikhatna atan an Chairman Lunglei DC, Pu Kulothungan A kaihhruaiin an thukhawm.

Meeting ah hian Member Secretary Pu PC Lalchhandama, DFO Lunglei leh member dangte – Sub Hqrs YMA aiawh, DLAO, DUDO leh Mizoram Pollution Control Board (MPCB) atangin Dr Lalramnghaki Pachuau, Scientist B te an tel a. Hemi bakah hian Department hrang hrang invitees te, National Highways and Infrastructure Development Corporation (NHIDCL) aiawhte leh Lunglei District huamchhunga National Highway hnathawh mek NH-54 leh NH-302 contractor-te ABCI Infrastructure, Bharatia JV (BIPL) leh SRK Constructions Project Manager-te an tel a ni.

Chairman Lunglei DC, Pu Kulothungan A chuan khawvel changkang chho zelah leilung hausakna, thing leh mau te kan ti chereu nasa hle a, chuvangin ram kan tih chhiat leh hemi avanga boruak, sik leh sa danglam nasa lutuk veng leh siamtha leh turin theihtawp a tan kan laka, Environmental Laws ding lai te tha taka kan zawm tlan a tul a ni, a ti a. Lunglei District huamchhunga National Highway hnathawh mek pahnih NH-54 leh NH-302 te chu kan ram economy than len zelnan an pawimawh takzet rualin heng kawngpui laih avanga environment tih chhiat anih lohnan Environmental Laws uluk taka kan zawm a tul a ni, a ti bawk. NHIDCL leh contractor te chu kawngpui an laihna leivung te a paihna hmun tura ruat dumping site ah chauh paih tur leh leivung te kawr leh luiah a luan luh lohnan heng hmunah te hian leivung dalna bang tha tak siam vek turin a hriattir a. Inspection pawh ngawrh taka kalpui anih tur thu a hriattir a ni.

Member Secretary Pu PC Lalchhandama, DFO Lunglei chuan NH-54 leh NH-302 hnathawhna hmunah te inspection anlo kalpui tawh thu leh leivung paihna hmun tura ruat dumping site pawna paih an hmuh avanga stay order cum show cause notice te tih chhuah anih tawh thu leh NHIDCL leh contractor ten hemi chungchangah chhanna anla neih loh thu a report a ni.

Dr Lalramnghaki Pachuau, Scientist B, Mizoram Pollution Control Board (MPCB) chuan NH-54 leh NH-302 hnathawktu contractor te chu Construction & Demolition Waste Management Rules 2016 an bawhchhe mek tih sawiin Environmental Laws ngai pawimawha zawm ngei turin a hriattir a. District Monitoring Committee On Compliance Of Environmental Laws ten inspection an rawn neih hma ngeia hmalak tul te lo zo fel turin a hriattir bawk.

NHIDCL hotute leh NH-54 (Package 3, 4, 5, 6) leh NH-302 (Package A&B) hnuaia Project manager-te chu leivung an paih dan, spoil bank an neih zat te leh leivung dalna gabion wall leh protective wall an neih leh neihloh te report ngaihthlak a ni.

Committee chuan contractor te chu leivung paihna hmun tur chauha paih tur leh a paihna hmunah te leivung dalna bang tha tak siam turin ni 15 hun chhung a pe a. Committee koh leh thuai anih dawn bakah Monitoring Committee te hian inspection an nei leh dawn a ni.