1007/2022-2023
Aizawl the 22nd June, 2022 : Ruahsur avanga chhiatna thleng chungchangah a hnuaia mi ang hian Mizoram Sawrkar Disaster Management & Rehabilitation Department chuan thuchhuah a siam.

Tun hnaiah ruah sur avangin Mizoram hmun hrang hrangah chhiatna a thleng a; chutihrualin, Sawrkar hmalakna te, DDMA hrang hrangte leh Khawtlang mipui, Tlawmngai pawlte tanrualna a zarah chak takin thenfai hna leh chhawmdawl hna thawka hma lak a ni hi a lawmawm hle a ni.

Kan hmaah furpui a lo la thleng dawn a, chuvangin mitin te fimkhur takin a theih anga lo inhmakhua zel a pawimawh hle a ni. Mizoram Sawrkar chuan Chhiatrupna (Disaster) lo thleng palh thei atana chhawmdawlna leh venhimna ha thawhna atan Rs. Nuai 630/- ruahmanin District hrang hranga DDMA te hnenah pek chhuah mek a ni.

Tunah hian DRC, Silchar atanga kan hriat danin tuilian vangin SynodMission Compound, Silchar-ah mi 320 (hnamdang tiam in) an tangkhang mek a, an zingah hian Mizo 16 an tel ve bawk a ni. Anni bakah hian chhungkhat leh thiante in lama sahimna zawng tangkhang mi 20 vel an awm rin a ni bawk.

Mizo tangkhang tanpui ngai an awm tih hriat a nih ve leh tanpui tur hian Mizoram Sawrkar chuan hma a la nghal a. Rescue Team tirin Bairabi atangin truck hmangin Ghungoor, Silchar-ah lawng dah thla turin kal mek a ni a, Silchar YMA te nen tangrualin tui chim chin atangin lawng hmangin tangkhangte chhanchhuak a, a theih ang anga tanpui turin hma lak tum a ni.

Lawng hi vawiin (22.06.2022) zing dar 10 khan truck ah load a ni a, dar 11 leh a chanve khan Bairabi an chhuahsan tawh a ni. Synod Mission Compound thleng tur hian darkar 3 vel hun an hman rin a ni. SP, Kolasib in tangkhangte thiar chhuahnan Bus leh Sumo a buatsaih bakah an ei tur te a ruahman sak bawk a, tunah hian Vairengteah a thutchilh mek a ni.