1008/2022-2023
Aizawl, 22nd June, 2022 : Vawiin khan Land Revenue & Settlement Minister Pu Lalruatkima hovin a pisa ah Revenue Department hotu pawimawh ten Mizoram chhunga Stamp Duty lak tur zat bithliah thar chungchang an sawiho.

Revenue Minister Pu Lalruatkima chuan tun dinhmuna Stamp Duty lak mek chu chhan hrang hrang vangin ennawn a tul tih a sawi a, mipui nghawng nasa si lo leh sawrkar tana tha tho si, hmasawnna thlen tur ni bawk si kan ngaihtuah a ngai a ni, a ti a. Stamp Duty bakah Mutation Fee leh Registration Fee te pawh ennawn a tul thu a sawi bawk.

Miin ram a lei leh a hralh a nih a a neitu an inthlakthleng hian The Indian Stamp Act, Mizoram amendment hnuaiah stamp duty pek a ngai a, he stamp duty hi a ram awmna leh a ram hmanna a zirin rate hrang hrang neih a ni a. Hetianga rate hrang hrang nei lo tur hian kum 2016 khan he Act hi siam that a ni a, rate hi 2% a dah tawp a ni a. Amaherawh chu ennawn ngai awm a hriat a nih avangin he dan siam thar hi hman a ni ta rih lova, vawiin hian ennawn leh niin a rate tur te sawi ho a ni a, a tul angin sawrkarah hmalak chhunzawm a ni ang.

Ram neitu (pass holder) hming thlakna a pawisa chawi ngai “Mutation fee” siam that chungchang leh Deed hrang hrang siamna a registration fee siamthat chungchangte pawh sawiho niin rawtna hrang hrang ngaihthlak a ni a. Vawiin meeting hian mipuiten Deed hrang hrang an siamin sawrkarah register a pawimawh tih hi hria se an duh thu tarlangin, mipuite zirtirna uar zawka kalpui pawh tulin an hria a, ruahmanna an siam nghal a ni. Lirthei hralhna, thurochhiah, ram/inhmun etc. in hlanchhawn leh thil dang danga Deed an siamin register zel hian a hnu zela harsatna awm thei lakah an him a ni tih hria in mipuiten hei hi ngai pawimawh se an duh hle a ni.
Heng bakah hian Revenue Department kaihhnawih thilah sawrkar dan ding laiin a phalsak angin mipuite tana phurrit a awm loh nan Deed Writers license siam a, hemi neite hnenah chauh hian Deed ziah phalsak a that thu sawi a ni a, mipuite tana na lo tura a fee pawh hi bituk a tha tih a ni bawk.

Vawiin meetingah hian Reveue Secretary Pu R. Zarzosanga, IAS, Additional Secretary Pu C. Lalrosanga, Joint Secretary Pi Angela Zothanpuii, Director Pu K. Laldingliana, Deputy Secretary Pi Zonunthari, Under Secretary Pu Lalhruaitluanga, Deputy Director Pu Remlalliana Hnamte, Settlement Officer (Aizawl District) Pu Victor Lalawmpuia leh Pi Lalengzami Ralte, Superintendent te an tel a ni.