1009/2022-2023
Aizawl, the 23rd June 2022 : Commerce & Industries Minister Dr. R. Lalthangliana hovin nimin khan Aijal Club Conference Hall ah Ministry of Petroleum & Natural Gas hnuaia Directorate General of Hydrocarbons (DGM), Oil & Natural Gas Commission (ONGC) leh Oil India Limited (OIL) aiawhten Department pali – Geology & Mining; Forests, Environment & Climate Change; Land Revenue & Settlement Department-te leh PWD hotute ten Joint Meeting neiin Mizorama lei hnuai hausakna – oil leh gas zawnchhuah kawnga hma an lak tawhna te leh hmachhawp an la neih te chu engtin nge chak zawka kalpui anih theih ang tih chu sawhoin hemi kawnga thil pawimawh hrang hrang te an thlirho a ni.

Commerce & Industries Minister Dr. R Lalthangliana chuan tunhnaia Delhi a zinin oil leh gas zawnchhuah kawnga thuneitu agency ber – Directorate General of Hydrocarbons a dawrnaah Mizorama oil leh gas zawnchhuah hna chu chak zawka kalpui anih theih nan hemi chungchang sawiho tura ONGC leh OIL aiawhte Mizorama lo zin tura a ngenna leh sawmna chu DGM lamin an ngaipawimawhin rang taka joint meeting nei tura lokal an tum chu lawmawm a tih thu a sawi a. Kum 20 chhunga Mizorama oil leh gas zawnchhuah hna ONGC leh OIL in an kalpui chu a muang nia a hriat thu sawiin chak zawka hemi kawnga hma an lak a pawimawh tiin hemi kawnga tul leh pawimawh Mizoram Sawrkarin a tih tur tur chu chak taka bawhzui mek anih thu a sawi.

Minister hian oil leh gas zawnchhuah kawnga Mininum Work Programme hnuaia ONGC in hmun thumah leh OIL in hmun ngaa leiverh hna (exploratory well) tukna a hma an lakna chu tlem a tih thu sawiin hei aia hmun tam zawka leiverh hna hi kalpui turin kawng dap nise tiin a ngen a. ONGC in hmun thum a lei verh an tumna, Hortoki bul drilling site chu Chief Minister hmalakna in a kawng pawhna tur sial mek a nih thu a sawi a. OIL in hmun nga na tura, Pangzawl lamah lei an verh na tur pawh bawhzui chak turin a ngen bawk a. Hei bakah oil leh gas zawnchhuahna hna thawktu oil company te license tawp tawh chu kum 4 dang atan pawhsei a tul hle tiin DGM lamin hei hi ngaipawimawh se tiin a sawi.

Joint meeting ah hian ONGC leh OIL aiawhte leh mithiamte chuan Mizorama oil leh gas zawnchhuah kawnga hma an lo lak tawh nate sawi zauin tlang rama oil exploration hna hautak bik dan te an tarlang a. Hemi kawnga an mahni puitu tur pawimawk tak, leihnuai chanchin chikhat seismic survey leh seismic data lakkhawm leh zirchian chuan hun a duh rei bakah tlangrama he chanchin zir a hautak leh a harsat dante an sawi lang a. Chuti chung chuang hemi kawnga chak zawka hma an lak theih nan aerial survey tih an tum thu an sawi. ONGC in lei an verhna tur Hortoki Drilling Site pawhna tur kawng sial mek chungchang chu PWD Engineer-in-Chief Pu Bowman’n sawiin hma an lak dante a tarlang a. ONGC Executive Director Pi Sushma Rawat chuan oil leh gas zawnchhuah kawngah ONGC in hma an lak tawh nate sawiin Hortoki drilling site pawhna tur kawng sial mek anih chu lawmawn tih thu a sawi. OIL mithiam Geophysicist Pu Y Ranjeet Singh pawhin hma an lak tawhnate sawiin seismic data chungchang a sawi zau a. DGM a Chief Geophysicist Pu Sarvind Ram chuan oil company te lei an verh theihna license tawp tawh chu kum 4 dang pawhsei turin an dawng tawh tiin hei hi bawhzui mek anih thu a tarlang.

Joint meeting chuan Mizorama oil leh gas zawnchhuah hna chak zawka kalpui anih theih nan leihnuai chanchin seismic data agency 2 in an lakkhawm leh an zirchian te chu inhmantawm thei tura hma lak nise tiin an rawt a. Mizoram Sawrkar aiawhte nen a khat tawkin oil company te hian meeting nei thin se tiin an rawt bawk a ni.

Meeting ah hian ONGC lamin an Executive Director bakah mithiam 2 an rawn tir a. OIL in an mithiam 3 leh DGM lamin an mithiam 2 an rawn in tir bawk a. Mizoram Sawrkar Department 4 hotulute bakah Pi Esther Lalruatkimi, Commissioner & Secretary, Commerce & Industries pawh meeting ah a tel a ni.

Mizorama oil leh gas zawnchhuah hna hi hlawm lian pathum a then niin hma lak a ni a. Block No. AA-ONN-2001/2 hi Mizoram hmar lam niin ram zau zawng square km. 2680 a huam a. He Block ah hian ONGC in hna thawkin an Minimum Work Programme hnuaia hmun 3-a leiverh hna zinga hmun hnih – Zanlawn leh Meidum chu an thawk zo tawh a. Zanlawn ah engmah an hmu lova, Meidum ah erawh gas an hmu a mahse hei hi ONGC lam chuan tam tawkah an ngaih loh avangin an tawng kamin a techno-feasibility a chhiat thu an sawi a. Hortoki drilling site ah lei verh an la hma bak a ni.

Block dang leh chu Mizoram laili bawr niin hei hi Block No AA-ONN-2004/1 tih niin ram zau zawng square km. 3213 a huam a. He Block ah hian OIL in hna thawkin an Minimum Work Programme hnuai a hmun 5-a lei verh hna zinga pali – Maubuang, Keifang, Thenzawl leh Phulmawi chu zo tawhin heng drilling site hi an tawngkamin unsuccessful drilling tiin engmah an hmuh loh thu an sawi a. Pangzawl lama drilling site hi an an la hma bak a ni. OIL mithiamte chu Pangzawl drilling site hi chhim lama awm anih avangin leh oil tamna Arakan Basin a hnaih avangin beiseina sang tak an neih thu an sawi a. Helai hmuna lei an verh hnua chanchin an lakkhawm leh an zirchian atangin Mizoram chhim lama oil leh gas zawnchhuah hna chu engemaw chen a hril thei ang tiin an ngaihdan an sawi.

Block dang leh chu Mizoram chhim lamah niin hei hi Block No. AA-ONN-2004/2 tia hming vuahin ram zau zawng square km 3619 a huam a. He Block a oil zawnchhuah hna chu Reliance Energy Ltd. pek an ni a, mahse hma lakna engmah an neih tak loh avangin DGM chuan an hna hi an cancel sak daih tawh a ni.