1010/2022-2023
Khawzawl 23rd, June, 2022: Nimin chawhnu khan Khawzawl District Bawrhsap Pu C.C. Lalchhuangkima hovin DC Conference Hall-ah tun thla ni 30 a Remna Ni lo thleng tur Khawzawla lawm dan tur ngaihtuahin meeting neih a ni a, he hunah hian Khawzawl khawpui chhunga Sawrkar Department Head of Office te, NGO leh Political Party aiawhte, Joint VC hruaitute leh MJA aiawhte an tel a ni.

He hunah hian Khawzawl District Bawrhsap Pu C.C. Lalchhuangkima chuan COVID-19 vanga kum hmasa lamahte Remna Ni hi mumal taka hman theih a nih loh thu leh kumina Remna Ni lawmna neih tur chu Khawzawl District puitling a nih hnua Remna Ni hmanna hmasa ber a ni dawn tih a sawi a. Kumin Remna Ni chu bialtu MLA, Dy. CM ni bawk Pu Tawnluia'n a hmanpui dawn tih a tarlang a, Remna Ni chu official ni lo mipuite ta a ni, a ti bawk.

He hunah hian Remna Ni lawmna neih dan tur Programme duan niin Remna Ni lawmna hi tun thla ni 30-ah Zaingen YMA Hall-ah neih a ni ang a, bialtu MLA Pu Tawnluia chu khuallian niin DC Pu C.C. Lalchhuangkima chu Chairman a ni dawn a. He hunah hian Sawrkar hnathawkte, NGO leh Party aiawhte, Joint VC hruaitute, Kohhran aiawhte, Khawzawl Higher Secondary School-a pawl 12 zirlaite, Martar chhungte, Ex-MNA te leh sawm bikte tel tura ruahman a ni.