1011/2022-2023
Mamit 23rd June, 2022 : Nimin tlai khan DC Office Chamber Mamit-ah Pu Lalnunhlua, District Bawrhsap/ Chairman, District Level Coordination Committee hovin Mamit District chhunga nikum 2021 chhunga African Swine Fever (ASF) avanga Vety Department-in Vawk hri kai an suat neitute hnena Sorkar atanga zangnadawmna pek tur chungchang thlirho a thutkhawm a ni.

Nikum 2021 chhunga Mamit District-a vawk hri lenna khaw 5, West Phaileng, Rawpuichhip, Tuahzawl, Reiek leh Ailawng khua-a Vawk 393 suatte hnena Sorkar atanga zangnadawmna pek tur Rs. 34,56,600/- chu Committee hian thlira pawmpuiin Vawkvulhtute account-ah hian an vawk chan dan mil zela thunsak an ni dawn a ni.

Kumina ASF leng mekah Mamit District chhungah hri avanga thi leh suat Vawk 890 awm mekin Vety Department-in hri laka fimkhur dan tur SOP a tihchhuahte tha tak zawm turin Meeting chuan mipuite a ngen a. Vawk la dam mekte an lo him theih nan vawk thi te tha taka phum a, thuneitute'n dan an siam te tha taka zawm tura ngen kan ni bawk.

Nimin thutkhawmah hian District Level Coordination Committee members-te an tel tha hle a ni.